“Тобол” бронза медалларига эга чиқди ва Конференциялар Лигаси саралашига йўл олди. Костанайликлар мусобақани 2-квалификация раундидан бошлаши кутилмоқда. Янги мавсумнинг саралаш ўйинлари эса 2023 йилнинг 13 июлидан старт олади.

Игорь Сергеев ўйнаётган жамоа бу мавсум ЕЧЛ саралашини илк босқичдаёқ (“Ференцварош” – 0:0, 1:5) тарк этди ва КЛ 3-квалификация раундида “Зриньски Мостар” (0:1, 1:1) тўсиғидан ўта олмади.

“Энергетик-БГУ” тарихда илк бор Беларусь юқори дивизионида мавсумни кучли учликда якунлайдиган бўлди. Жамоа камида 2-ўринни нақ қилган. Аввалроқ, Бобир Абдихолиқов мусобақа тарихида бир мавсум давомида гол уриш (26 та) бўйича энг яхши легионерга айланиб олгани ҳақида хабар бергандик. Шунингдек, ушбу жамоада ўзбекистонликлардан Абдуқодир Ҳусанов ва Амирбек Бақоев ҳам ҳаракат қилади.

Минскликларни олдинда 12 ноябрь куни “Динамо”га қарши охирги тур баҳси кутиб турибди. Пешқадам “Шахтёр” (Солигорск) эса шу куни “Белшина” билан баҳс олиб боради. Орадаги фарқ икки очкони ташкил этмоқда.

“Энергетик-БГУ” мусобақани иккинчи бўлиб якунласа, кейинги мавсум Конференциялар Лигаси 2-саралаш босқичида иштирок этади. Агар чемпионлик қўлга киритилса, у ҳолда жамоа Чемпионлар Лигаси янги мавсумини 1-квалификация раундидан бошлайди. ЕЧЛда саралаш учрашувлари 2023 йил 27 июндан старт олади.

⚡️ Абдихолиқов ва Сергеев ўйнаётган жамоалар кейинги мавсум еврокубокда қатнашиши аниқ