Ivan Boshkovich shogirdlari aniq va ishonchli harakat qilgan holda ortga 2:0 hisobidagi g'alaba bilan qaytdi. Shu kuni "So'g'diyona" tarkibida bir necha nafar sobiq "qaldirg'ochlar" to'p tepishdi. Ulardan biri Abdulloh Omonaliev o'yindan so'ng saytimizga fikrlari bilan o'rtoqlashdi.

"O'yin ko'ngildagidek o'tdi. Muhimi g'alabaga erishdik. Xatolarimiz yo'q emas. "So'g'diyona"dagi debyut o'yinimda "Bunyodkor"ga qarshi harakat qilish boshqacha emociyalarni berdi, deya olaman. Bizni qo'llab-quvvatlagan muxlislarga, ota-onamga katta rahmat aytaman.

Ivan Boshkovich ishonch bildirmoqda. Berilgan har bir imkoniyatdan foydalanishga harakat qilaman. Kelajakda maqsadim Evropada to'p tepish. Shunga intilmoqdaman.

Birinchi davrada maydonga tushmaganimga kelsak, hech kimdan ayb qidirmagan bo'lardim. Balki mashg'ulotlarda etarlicha ishlamagandirman. Nima bo'lsa, ortda qoldi. Buyog'iga oldinga qadam tashlash kerak. "So'g'diyona"ni qolgan o'yinlarda faqat g'alaba qoniqtiradi. Chunki boshqa yo'limiz yo'q",- deydi Abdullo Omonaliev.

Abdulaziz Iskandarov yozib oldi

Abdulloh Omonaliev: "Debyut o'yinda "Bunyodkor"ga qarshi harakat qilish o'zgacha emociyalarni berdi"