Bir necha kun Superliga doirasida "Buxoro" bilan kuch sinashgan "Bunyodkor" kecha kubok uchrashuvida ham o'zaro to'qnash keldi. O'yindan so'ng "qaldirg'ochlar" darvozasini qo'riqlagan Abdumavlon Abdujalilovning fikrlarini tingladik.

- Bu g'alabani omadga qiyoslash to'g'rimi?

- Bir tomondan omadga ham bog'liq. Lekin buning tagida katta mehnat yotibdi. Bir kishi kam bo'la turib 45 daqiqa himoyalandik. Sabr qilib, murabbiyimizning ko'rsatmalarini bajarganimiz uchun oxirgi daqiqada g'alaba qozondik desam ham bo'ladi. Birinchi bo'lim oxirida bir kishi kam bo'lib qoldik. Bu ham yaxshilikka ekan yakunda o'zimiz istagan natijaga erishdik deya olaman.

- "Bunyodkor" orqada kamroq xato qilib oldinda vaziyatlardan maksimal foydalanyapti. Bu jamoaning falsafasiga aylandimi?

- O'tgan yilga nisbatan o'yin uslubimiz o'zgargan. To'pni ko'proq nazorat qilishga harakat qilyapmiz. Bunga mos futbolchilar jamoamizda ko'p. Zamonaviy futbolda himoyalanishni ham, hujum qilishni ham bilish kerak. Tarozining ikki pallasi kabi balans zarur. Oldinda bundanda qiyin o'yinlar bor. Xudo xohlasa o'zimizning kuchimizni ko'rsatishga intilamiz.

Abdumavlon Abdujalilov: "Omadning tagida katta mehnat yotibdi"