"Keyingi turdagi raqibimiz “Paxtakor” jamoasi bo'lganligi bois toshkentliklarning Osiyo chempionlari ligasidagi oxirgi uchrashuvini sinchkovlik bilan kuzatib bordim. Rostini aytish kerak, paxtakorchilar menda juda iliq taassurot qoldirdi. “Al Jazira”ga qarshi o'yinda jamoaning barcha chiziqlari faollik ko'rsatishdi. Ayrim xatolar bo'ldi, biroq yakuniy natija klub rahbariyatini ham, muxlislarini ham to'liq qanoatlantirdi. “Paxtakor”da pley-offga chiqish uchun real imkoniyat paydo bo'ldi.

Paxtakorchilarning g'ayrat-shijoati, maydonning har bir qarichi va har bir to'p uchun faol kurashganliklari tahsinga sazovor. Oldingi uchrashuvlaridan “Al Jazira”ga qarshi o'yini tubdan farq qildi. Ayniqsa, darvozabon Nikita Ribkinga alohida tahsin aytish kerak. jamoaning muvaffaqiyatida uning hissasi katta bo'ldi. Menga shuningdek, jamoa tayanch yarim himoyachilari Sherzodbek Karimov, Javohir Sohibov, Jaloliddin Masharipov, hujumchi Igor Sergeevlarning harakatlari ham maqul bo'ldi.

Futbolchilik faoliyatining katta qismi “Paxtakor” safida o'tgan. Mamlakatimizning bosh jamoasi stadioniga hamisha ulkan hayajon bilan qadam tashlayman. Zero bu o'yingoh minglab, millionlar charm to'p ishqibozlarimizning xursandchilik onlariga shohid bo'lgan. Ne ne yulduzlar bu erda to'p surishmagan deysiz. Shu manoda muqaddas stadiondagi muhit, taassurotlar doimo o'zgacha, yurakdan va samimiy bo'ladi.

Bevosita “Metallurg”ning amaldagi chempionga qarshi o'yiniga tayyorgarligi haqida to'xtaladigan bo'lsam, uchrashuvga jiddiy hozirlanyapmiz. Paxtakorchilar tarkibi juda kuchli va ularga qarshi o'yin biz uchun oson kechmaydi. Bundan tashqari bizning tarkibimizda o'tgan yilgiga nisbatan sezilarli o'zgarishlar bo'ldi. Tarkib yoshardi deyish mumkin. Yangi, yosh o'yinchilar bilan esa chempionga qarshi turishning o'zi bo'lmaydi. Qolaversa, “Paxtakor” ketma ket duranglar tufayli peshqadamlardan biroz ortda qolyapti. Toshkentliklar bu yog'iga har bitta o'yinga ikki hissa kuch bilan tushishlari aniq. Bizni xursand qiladigan jihat Jahongir Abdumo'minovning diskvalifikaciyasi tugab, safga qaytganligidir. Safimizda jarohatlanganlar yo'q. Nasib bo'lsa barcha o'yinchilarimiz bor kuch va mahoratlarini namoyish etishadi. Ijobiy natija uchun to'p suramiz", - deydi Marufaliev.

"Metallurg" matbuot xizmati

Abduqahhor Marufaliev: “Paxtakor” OCHLda kuchli taassurot qoldirdi