Klubga oid eng so'nggi yangilik deb esa Abdusamad Do'rmonovni yana “Neftchi”ga qaytganini aytish lozim. Muxlislarga yaxshi malumki, Do'rmonovlarning to'ng'ichi “Neftchi” uchun begona emas. Sababi futbolchilik davrida eng yorqin damlarini aynan Farg'ona klubida o'tkazib, keyinchalik ham ushbu jamoa murabbiylar shtabida samarali ish olib borgan Do'rmonovni mahalliy ishqibozlar doimo qadrlaydi.

Ilgari “Neftchi” yoshlar jamoasini boshqargan kezlarida faqat medallar uchun kurashib, asosiy tarkibga munosib kadrlarni etishtirib bergan Abdusamad Do'rmonovni hech ikkilanmasdan bemalol yoshlar bilan ishlash hadisini olgan murabbiylar qatoriga qo'shish mumkin. Shu bois bo'lsa kerak, rahbariyat yana ushbu mutaxassisni jamoaga qaytarishga qaror qildi. Kelasi yil Do'rmonov asosiy jamoada Andrey Fyodorovga yordam beradi yoki yoshlar jamoasi boshqaruvini o'z qo'liga olishi mumkin. Hozircha bu borada aniq to'xtamga kelinmadi.

Bosh murabbiy Andrey Vitalevich Moskvadan qaytib kelgach, ushbu masalaga oydinlik kiritilishi kutilmoqda. Eslatib o'tamiz Do'rmonovning bungacha so'nggi jamoasi birinchi liga qatnashchisi “Yozyovon-Lochinlari” edi.

Abdusamad Do'rmonov “Neftchi”ga qaytdi