Namangandagi markaziy qarama-qarshilik fonida qolgan o'yinlar ham shiddati, tomoshabopligi bilan qolishgani yo'q. Xususan, kecha Samarqandda kechgan uchrashuv ham shular qatoridan o'rin oldi deya olamiz. Vadim Abramov jamoasining ilk mag'lubiyati diqqat markaziga chiqdi. "Bunyodkor" esa ortda qolgan qiyin davrdan o'tib oldi. Quyida ushbu o'yin haqidagi fikrlarimni bildirishni lozim topdim.

- Turnir jadvali nuqtai nazaridan olib qaralganda Vadim Abramov kecha mag'lubiyatga uchraganiga qaramay aslida mantiqan hech narsa yo'qotgani yo'q. Turnir jadvalidagi o'rniga tasir o'tkazmadi. Chempionlik bosh maqsad emasligi kundek ravshan, kuchli uchlik yoki to'rtlik ham ularga zo'r natija hisoblanadi. "Nasaf" bilan oradagi farq 6 ochko, zaxiradagi "Neftchi" bilan o'yindagi ehtimoliy g'alaba farqni 3 taga qisqartiradi. Bundan tashqari "ajdarlar"ning yuqori o'yin suratidagi "Paxtakor"ga qarshi o'yini kutmoqda. Bu bilan Karlenovich jamoasini mag'lubiyat uchun tayyorlagan demoqchi emasman, bunday bo'lmaydi ham. Shunchaki kecha "Dinamo"ning kuni emasdi, boz ustiga markaziy himoyachilarning xatolari qimmatga tushdi. Gohida shunday mag'lubiyatlar ham biroz tin olib kamchiliklarni ko'rib olishga foyda bo'lib xizmat qiladi. Qiziq fakt shuki, jamoa oxirgi marotaba Samarqandda aynan "Bunyodkor"dan 3 ta gol o'tkazgan ekan (2024 yil, 21 sentyabr, 2:3). Endilikda "Dinamo" 27 iyun kuni Qo'qonga safar qilishadi.

- "Bunyodkor" va Zeytullaev uchun o'tgan 2 oy qiyin o'tdi. Ketma-ket g'alabasiz o'yinlar fonida istefo kabi gap-so'zlar tarqaldi, boshqa murabbiy haqida o'ylashni boshlab yuborishdi. Lekin jamoa ko'rsatayotgan o'yin hattoki o'sha durang o'ynagan, yutqazgan o'yinlarda ham uyaltiradigan holatda emasdi. Futbolchilarda ishonch, o'yinda tartib bor. Futbolchilar aniq vazifasini biladi, bir-birini yaxshi tushunadi. O'zbekiston Kubogida "Qo'qon-1912"ning taslim qilinib keyingi bosqichga chiqilishi va Samarqanddagi yirik hisobli g'alaba orqali Zeytullaev "Bunyodkor"ga munosibligini, u hali natija qila olishini isbotlay oldi va aynan bu g'alabalar kerakli pallada qo'lga kiritildi. To'g'ri, jadvalda ko'tarilib olmadi yoki tushib ketmadi. Lekin murabbiy yuqorida aytganimdek gap-so'zlarga va atrofdagi jarayonlarga futbol bilan chiroyli javob bera olishga muvaffaq bo'ldi.

Abramov mantiqan hech narsa yo'qotmadi, Zeytullaev uchun kerakli g'alaba edi - Abdulaziz Iskandarov tahlili