O'zbekiston chempionatining may oyidagi eng yaxshi futbolchisi va murabbiyini aniqlash bo'yicha OAV xodimlari, jurnalistlar o'rtasida o'tkazilgan so'rovnoma 4-8 iyun kunlari bo'lib o'tdi. So'rovnomada jurnalistlar Oliy Liga va Birinchi Liga klublarida faoliyat olib borayotgan jami 8 nafar murabbiy va 14 nafar futbolchini g'oliblikka davogar sifatida ko'rsatishdi.

Murabbiylar o'rtasidagi kurashda Lokomotiv bosh murabbiyi Vadim Abramov birinchi bo'ldi. May oyi davomida o'tkazilgan uchrashuvlarda uning jamoasi Paxtakor bilan durang o'ynab, qolgan barcha o'yinlarda g'alaba qozondi. Buning samarasi o'laroq, Lokomotiv musobaqa jadvalida peshqadamlikni Paxtakor bilan bo'lishib turibdi – to'plar nisbatidagi yaxshiroq ko'rsatkich hisobiga Abramov jamoasi musobaqada birinchi bo'lib turibdi. Qayd etish joiz, mart va aprel oylari so'rovnomalarida Abramov to'rtinchi bo'lgandi.

Futbolchilar orasida esa may oyida Paxtakor yarim himoyachisi Jamshid Iskanderov birinchi bo'ldi. May oyida u jamoasining muvaffaqiyatlariga salmoqli hissa qo'shib, Paxtakorning musobaqa jadvalidagi peshqadamligini saqlab qolishga katta hissa qo'shdi. Qayd etish joiz, Iskanderov mart oyida ham tengsiz deb topilgandi. Etiborli tomoni, dastlabki uch oy yakunlariga ko'ra, faqat Paxtakor futbolchilarigina oyning eng yaxshi o'yinchisi deb topilmoqda.

Malumot o'rnida, mart-noyabr oylarida o'tkaziladigan Oyning eng yaxshi futbolchisi va murabbiyi tanlovilarining natijalari umumlashtirib chiqiladi va natijalardan kelib chiqib, O'zPFLning 2014 yildagi eng yaxshi futbolchisi va murabbiyi nomi aniqlanadi.

Oyning eng yaxshi o'yinchisi so'rovnomasi may oyi kuchli beshligi:
1. Jamshid Iskanderov (Paxtakor) – 15 ball.
2. Farhod Tojiev (Lokomotiv) – 10 ball.
3. Diyor Turopov (Olmaliq) – 9 ball.
4. Ivan Nagaev (Lokomotiv) – 8 ball.
5. Aleksandr Pishur (Bunyodkor), Ignatiy Nesterov (Lokomotiv) – 7 ball.

Oyning eng yaxshi murabbiyi so'rovnomasi may oyi kuchli beshligi:
1. Vadim Abramov (Lokomotiv) – 19 ball.
2. Samvel Babayan (Paxtakor) – 13 ball.
3. Ro'ziqul Berdiev (Nasaf) – 12 ball.
4. Aleksandr Volkov (Bunyodkor) – 6 ball.
5. Rustam Mirsodiqov (Metallurg), Baxtiyor Ashurmatov (Navbahor) – 5 ball.

Abramov va Iskanderov – may oyi laureatlari!