Nazorat o'yini
20 fevral, payshanba
AGMK - "Rubin" 4:0
Gollar: Vatsadze (15, assist: Jokich), Yo'ldoshev (63, assist: Qosimov), Erkinov (75), Qosimov (86-penaltidan)

AGMK (4-2-3-1) - Suhrob Sultonov - Akmal Shorahmedov, Igor Zonich, Sardor Rahmonov, Saydullo Rahmatov - Erkin Baydullaev, Yovan Jokich - Arslonmirat Amanov, Bahrom Abdurahimov, Elguja Grigalashvili - Mate Vatsadze.

Ikkinchi bo'limdagi o'ynagan tarkib (4-3-3) - Roman Abdulov - Mirg'iyos Sulaymonov, Dilshod Jo'raev, Bobur Yo'ldoshev, Sheroz Jalolov - Saydullo Toshpo'latov, Mirjamol Qosimov, Shahzod Nurmatov - Murod Toshmatov, Zafar Polvonov, Xojimat Erkinov.

Mazkur o'yinda Mirjalol Qosimov boshchiligidagi murabbiylar shtabi har ikkala taymda ikki xil tarkibni tushirib, deyarli barcha futbolchilarga imkoniyat taqdim etdi.

Jasur Umarov va Sanjar Tursunov bu galgi o'yinni mikro jarohat tufayli o'tkazib yuborishdi. Uchrashuvni katta ustunlikda o'tkazgan olmaliqliklar birinchi bo'limda ko'plab xavfli vaziyatlar sodir etishdi. Shularning biri o'yinning 15-daqiqasiga to'g'ri keldi va Jokichning uzatmasidan so'ng qulay vaziyatga chiqib borgan Mate Vatsadze aniq zarba orqali bahsda hisobni ochdi - 1:0.

Qolgan vaziyatlarda "Rubin" posboni o'z jamoasini qator gollardan qutqarib qolishga muvaffaq bo'ldi va jamoalar 1:0 hisobidagi natija bilan tanaffusga chiqib ketishdi.

Tanaffusdan keyin, aniqrog'i o'yinning 63-daqiqasida Mirjamol Qosimovning burchak zarbasidagi uzatmasini Bobur Yo'ldoshev boshi bilan golga aylantirdi - 2:0.

Hujumlar yomg'irini yog'dirgan olmaliqliklarning 75-daqiqadagi urinishi ham samara keltirdi. Hujumda faollik ko'rsatgan vingeri Xojimat Erkinov himoyachilardan qochib ketib, uchrashuvdagi hisobni yirik ko'rinishga keltirdi - 3:0.

Bahs tugashiga 4 daqiqa qolganida jarima maydonchasi ichiga yorib kirayotgan Xojimat Erkinovni raqib himoyachisi chalib yiqitdi va hakam 11-metrlik nuqtani ko'rsatdi. Penaltini esa Mirjamol Qosimov aniq amalga oshirib, yakuniy hisobni o'rnatdi - 4:0.

AGMK nazorat o'yinida yirik g'alabaga erishdi