Kechaning asosiy qahramonlaridan biri, shubhasiz, uchrashuvda hisobni ochgan Sherzod Nasrullaev bo'ldi.

Malumot uchun, u 1998 yil Kosonda tug'ilgan. Muxlislar nazarida futbolchining ampluasi, o'yin uslubi, maydondagi harakatlari-yu raqami ham (34) Farruh Sayfievni eslatadi.

Sherzod bolaligida Fabiu Koentrauning muxlisi bo'lib, portugaliyalik fulbek singari 5-raqamda maydonga tushar edi. "Ajdarlar"ning asosiy jamoasiga kelganida Ro'ziqul Berdiev uni Sayfievga o'xshatgani uchun "Paxtakor"ga o'tib ketgan Faraning raqamida o'ynashni taklif qiladi.

Etiborli jihati, uning Superligadagi debyuti aynan Sayfievli "Paxtakor"ga qarshi to'g'ri kelgan. 2019 yilning 2-yarmidan "Nasaf"ning asosiy tarkibidan o'rin egallay boshlagan himoyachi o'tgan mavsumga kelib, "ajdarlar"ning almashtirib bo'lmas vakiliga aylandi. 2021 yilda Nasrullaev o'tkazib yuborgan 4 o'yinning 2 tasi Qarshi jamoasining mag'lubiyati bilan tugadi. O'sha bahslardan keyin Berdiev ham jamoaga Sherzod etishmayotgani haqida gapirishga majbur bo'lgandi.

Nasrullaev himoyada tartibli o'ynashdan tashqari, doimiy ravishda oldinga tashlanib, raqib mudofaachilarini ham sarosimada ushlab turadi. Bu haqda statistika "gapirgani" maqul:
1. U Superliga-2021'ning eng yaxshi pleymeykeriga aylandi (7 assist).
2. OFK kubogida ham Sherzodning oldiga tushadigani bo'lmadi. Turnir doirasida 7 ta uchrashuv o'tkazgan futbolchi 1 gol, 6 ta golli uzatmaga mualliflik qildi.

Qadrli muxlis, siz qanday fikrdasiz: ayni paytda O'zbekistonning eng kuchli chap qanot himoyachisi kim?

"Ajdarlar" tarkibidagi Sher haqida