Unda mehmonlar ustozi Akmal Rustamov fikrlarini bildirdi.

"O'yin juda vaziyatlarga boy bo'ldi, "Nasaf" bilan uchrashuvdan so'ng bu bahsga yaxshi tayyorgarlik ko'rgan edik. Qaysi jamoa gol ursa yutib ketardi. Birinchi bo'limda 2-3 ta golga tortadigan vaziyat yaratdik. Oxirgi zarbani berishda oqsayapmiz. Taqdir shu ekan omad Namanganga kulib boqdi. Bitta gol urib g'alabani ilib ketdi",- deydi Akmal Rustamov.

- "Qizilqum" oxirgi o'yinlarda yaxshi o'ynamoqda. Lekin ruhiy faktormi, birinchi va ikkinchi bo'limdagi jamoada farq bo'ldi...

- Bu gapingizga qo'shilmagan bo'lardim. Jamoa ruhan yaxshi holatda. O'yindan keyin oraliq kam, yo'l ham o'z tasirini o'tkazmay qolmaydi. Birinchi bo'limdagi vaziyatlarni golga aylantirganimizda 1:0 yutishimiz mumkin edi. Omad "Navbahor" tomonida bo'ldi.

- O'zgartirishlar o'zini qanchalik oqladi?

- O'zgarishlarni aytsam, Nikola Kumburovich va Ilhom Vahobov jarohat olgan. Ular tiklangunga qadar o'zimizning yoshlarga qo'rqmasdan imkoniyat beramiz. Mana shunday o'yinlarda o'zlarini ko'rsatsa, keyinchalik ham asosiy tarkibda o'rinlarini topib ketishadi.

- Legionerlardan qanchalik qoniqdingiz?

- 3 nafar legionerimiz maydonda edi. Men ikkinchi bo'limda charchoq alomatini ko'rdim. Umuman olganda qoniqdim. Nafaqat ularga balki hamma yigitlarga rahmat aytmoqchiman.

- "Navbahor"da murabbiy o'zgarishi rejalaringizga qanchalik tasir qildi?

- Bu tabiiy holat. Futbolda birinchi murabbiy ketsa, ikkinchisi keladi. Biz o'z o'yinimizni o'ynashimiz kerak edi. Bunga murabbiyning aloqasi bor yoki yo'q deya olmayman.

- Bu yilgi chempionlik kimga nasib qilishi mumkin?

- Hozir aytish qiyin. Oldinda 8 ta tur bor. "Nasaf" 2 ta frontda jang olib boryapti, ularga oson bo'lmaydi. "Neftchi"da esa yuklama kamroq. Shu bois avvaldan gapirish noto'g'ri bo'ladi.

Akmal Rustamov: "Omad "Navbahor" tomonida bo'ldi"