Unga ko'ra Toshkentdagi "Bunyodkor" - "Metallurg" uchrashuvi Akobirxo'ja Shukurullaevga ishonib topshirildi. Oradagi voqealar bilan chalg'ib mazkur mavzuga oid ayrim jihatlar yoddan ko'tarildi. Keling bir boshidan boshlasak!

"Olimpik" - "Qizilqum" o'yini

Superliganing 23-turidan o'rin olgan mazkur uchrashuvning 72-daqiqasida Akobirxo'ja Shukurullaev "Qizilqum" futbolchisi Akaki Shulayaga birinchi sariq kartochkani ko'rsatadi. Oradan 5 daqiqa o'tib ikkinchi sariq va futbolchi maydondan chetlatiladi. Qoidaga ko'ra bu vaziyatda VAR ikkinchi sariqqa aralasha olmasdi va qaror qabul qilish bosh hakamning o'ziga qolardi. Amalda hakam Shulayani qizil kartochka bilan kiyim almashtirish xonasiga kuzatib qo'ydi.

"Qizilqum" uchun xushxabar

2 noyabr kuni bir tur avval diskvalifikaciyaga uchragan Akaki Shulayaning qizil kartochkasi ko'rib chiqilgani va "Andijon" bilan uchrashuvdan avval bekor qilingani haqida xabar chiqdi.

Superliganing 23-turi doirasidagi “Olimpik” - “Qizilqum” uchrashuvining 77-daqiqasida Qizilqum futbol klubi futbolchisi A. Shulayaga uchrashuv bosh hakami tomonidan berilgan birinchi va ikkinchi sariq kartochka, qizil kartochka bo'yicha vaziyat O'zbekiston futbol hakamlari markazining tashabbusi bilan Ekspert hakamlar komissiyasi tomonidan ko'rib chiqilib, bosh hakam tomonidan ushbu vaziyatda xato qaror chiqarilgan, deb topilgan.

Tartib-intizom qo'mitasining qaroriga ko'ra, “Olimpik”- “Qizilqum” uchrashuvi bosh hakami tomonidan Akaki Shulayaga mazkur uchrashuvda ko'rsatilgan barcha kartochkalar O'FA Intizom kodeksining 5.61-bandiga asosan O'zbekiston futbol hakamlari markazi Ekspert hakamlar komissiyasi bilan kelishilgan holda bekor qilindi. Shulaya esa keyingi o'yinda maydonga tushib gol urdi.

O'zFHM rahbari bu borada nima deydi?

Hakamning Shulayaga ko'rsatgan kartochkalari xato, deb aytilgan bo'lsa, o'sha pallada O'zFHM hakamga nisbatan jazo qo'llanilgani haqida malum qilgani yo'q Akobirxo'ja Shukurullaev 24-turda birorta o'yinda ishlamadi va shunchaki o'tkazib yubordi. Endi esa 25-turda hakamga uchrashuv berildi. Tartib-intizom qo'mitasi hakam xato qilganini aytmoqda. Xo'sh, unga nisbatan jazo qo'llanilganmidi? Bu borada O'zFHM rahbari Laziz Qo'chqorovga yuzlandik:

"O'sha uchrashuvdan so'ng Akobirxo'ja Shukurullaevga nisbatan jazo qo'llanilgan. U 24-tur va qoldirilgan tur uchrashuvlari, kubok finalini boshqarish imkoniyatidan mahrum bo'ldi. Xabar berilmagani sabab, shundoq oxirgi paytlarda hakamlar chetlatilgani bog'liq xabarlar ko'payib ketdi. Hakam esa xatosi uchun jazolangan",- deydi Laziz Qo'chqorov.

Bundan xulosa qilish mumkinki, Akobirxo'ja Shukurullaev "Olimpik" - "Qizilqum" bahsida xatoga yo'l qo'ymaganida balki "Nasaf" - OKMK o'rtasidagi finalida ishlashi mumkin edi.

Akobirxo'ja Shukurullaev O'zbekiston kubogi finalida ishlashi mumkin edi. Lekin...