Ushbu turda Toshkentning ikki klubi "Bunyodkor" hamda "Paxtakor" o'zaro bellashishdi. Bo'lib o'tgan uchrashuvda "sherlar" raqiblarini 1:0 hisobida mag'lubiyatga uchratishdi. Qiziqarli kechgan uchrashuvdan so'ng, "Bunyodkor" klubi himoyachisi Akrom Komilov o'z fikrlari bilan o'rtoqlashdi.

"Bo'lib o'tgan uchrashuvni butun o'zbekistonlik futbol muxlislari ko'rib turdi, biz mag'lubiyatga loyiq emas edik. O'yin vaqtida qanot hakami istagan ishini qildi, buni federaciya ko'rib chiqib, qattiq chora ko'rishadi, degan umiddaman. Mana shunday o'yinlar ko'payaversa futbolimiz kundan kunga pasayib ketaveradi. Birinchi vaziyatda qanot hakami yo'q joydan gol deya hammamizni asabiylashtirdi, keyinroq bosh hakam yo'q golni inobatga olmadi.

O'sha vaziyatda to'p darvoza chizig'ining yaqiniga ham bormagan edi. Bundan tashqari futbolchilar bir to'da bo'lib yig'ilib qolgan paytda, yon hakam qanday qilib yo'q golni ko'rdi? Jamoa jonini berib maydonda to'p tepadi, lekin bitta xato bizni mag'lubiyatga uchratadi, shunisi alam qiladi. Butun o'zbekistonlik muxlislar qanday o'yin bo'lganini ko'rdi, boshqa gap aytishga xojat yo'q", - deydi "Bunyodkor" futbolchisi Akrom Komilov

Jahongir Sotvoldiev suhbatlashdi

Akrom Komilov: "Boshqa gap aytishga xojat yo'q..."