Ushbu o'rtoqlik o'yini oldidan terma jamoamiz himoyachisi Akrom Komilov o'z fikrlarini bildirib o'tdi.

- Urugvay terma jamoasiga qay darajada tayyorgarlik ko'rdinglar?

- Urugvay terma jamoasiga jiddiy tayyorgarlik ko'ryapmiz. Murabbiylarimiz kerakli ko'rsatmalarni bermoqda va oldingi o'rtoqlik o'yinidagi yo'l qo'yilgan xatolarni qaytarmaslik ustida ishlayapmiz. To'pni ko'proq o'zimizda ushlab turib qarshi hujumga o'tish ustida mashg'ulot o'tkazyapmiz.

- Urugvay bilan o'yin o'rtoqlik maqomiga ega bo'lsa ham oldinglarga vazifa qo'yildimi?

- To'g'ri, bu o'rtoqlik o'yini bo'lsa ham bizga Urugvay terma jamoasini mag'lub etish shart, degan vazifa qo'yilgani yo'q. Lekin, ushbu nazorat uchrashuvida o'z o'yinimizni ko'rsatib, ulardan kam emasligimizni isbotlamoqchimiz. Shu o'rinda o'z oldimizga xalqimizni xursand qilish vazifasini qo'yganmiz.

- Urugvay terma jamoasida, Luis Suares, Edinson Kavani, Diego Godin kabi kuchli futbolchilar bor. Ularga qarshi o'yinash siz uchun qanchalik qiziqarli?

- Sanab o'tilgan ushbu futbolchilarga qarshi o'ynash qiziqarli. Shu bilan birga biroz xayajon bo'lishi aniq. Ushbu futbolchilarga qarshi to'p tepish bizning kuchimizga yanada kuch qo'shadi. Barcha futbolchilaridan xavf kutsa bo'ladi. Ular bekorga eng yaxshi jamoalar qatorida yurishmayapti.

Jahongir Sotvoldiev suhbatlashdi

Akrom Komilov: "Urugvaydan kam emasligimizni isbotlamoqchimiz"