“Temiryo'lchilar” “Qirol Fahd” stadionida “Al Hilol”ga qarshi bahs olib borishadi.

Bu “Lokomotiv”ning “Al Hilol”ga qarshi uchinchi o'yini bo'ladi. Esingizda bo'lsa, o'tgan yilgi OCHLda ikkala jamoa ham bir guruhdan joy olgan va har ikkala uchrashuvda ham saudiyaliklar g'alaba qozonishgandi: Ar Riyodda 3:1, Toshkentda 2:1. Ammo bu safar hammasi boshqacha bo'ladi degan umiddamiz.

– Osiyo chempionlar ligasi yangi formatga o'tganidan beri (2009 yil) “Al Hilol” musobaqaning 1/16 final bosqichida ishtirok etib kelayotgan yagona klub hisoblanadi. Bu jamoa 2010, 2012, 2014, 2015 yilgi mavsumlarda mazkur bosqichdan o'ta olgan, biroq 2009, 2011, 2013 yilgi mavsumlarda o'z yurishini 1/16 finalda to'xtatgan.

– “Al Hilol” oxirgi marta Ar Riyodda 2013 yilning 16 mayida mag'lub bo'lgan. Jamoa Qatarning “Laxviya” klubiga 0:1 hisobida yutqazib qo'ygan.

– “Al Hilol” o'z maydonida O'zbekiston klublariga qarshi etti marta bahs olib borgan va barchasida g'alaba qozongan. Bu jamoa oxirgi marta “Paxtakor”ni 4:1 hisobida engdi.

– “Al Hilol” tarkibida braziliyalik Aylton uchta gol bilan jamoasining OCHLdagi eng yaxshi to'purari bo'lib turibdi.

– O'tgan yil “Loko” bilan kechgan o'yinlarda gol urgan beshta futbolchidan to'rt nafari hozir ham “Al Hilol” safida. Bular – Saud Kariri, Yusuf Al Salem, Navaf Al Obid va Abdulla Al Zori. Birgina braziyaliklik Tyago Neves jamoani tark etib, BAAning “Al Jazira” klubi safiga borib qo'shilgan.

– “Al Hilol” joriy mavsum Saudiya chempionatini ikkinchi o'rinda tugatdi. Ular oxirgi bellashuvada “Al Faysali” bilan 0:0 hisobida durang o'ynashdi. “Al Hilol” musobaqa jadvalida chempion “Al Ahli”dan sakkiz ochko ortda qoldi.

– O'z tarixida to'rtinchi bor OCHLda ishtirok etayotgan “Lokomotiv” birinchi marta musobaqaning 1/16 final bosqichiga chiqdi. Bu yil guruhdan chiqqan yagona o'zbek klubi ham aynan “Lokomotiv” bo'ldi.

– “Lokomotiv” Eronning “Zobaxan” klubi singari guruh o'yinlarini mag'lubiyatsiz o'tkazdi, jamoa ikkita o'yinda g'alaba qozonib, to'rt marta durang o'ynadi.

– “Lokomotiv” bungacha Saudiya Arabistonida ikki bor to'p tepgan. Jamoa o'tgan yil “Al Hilol”ga 1:3 hisobida imkoniyatni boy bergan bo'lsa, shu yil “Al Ittihod” maydonidan 1:1 natijasi bilan qaytgan.

– “Al Hilol”ga qarshi o'yinlarda Ar Riyodda Sardor Mirzaev, Toshkentda esa Temurxo'ja Abduxoliqov gol muallifi bo'lishgan. Ularning ikkalasi ham hozirda jamoa bilan birga.

– Temurxo'ja Abduxoliqov uchta goli bilan “Loko”ning Osiyo chempionlar ligasidagi eng yaxshi to'purari bo'lib turibdi.

"Al Hilol" - "Lokomotiv". O'yinga oid malumotlar