Кун давомида "аждарлар"нинг айни пайтдаги ҳолати, ўзаро учрашувлар тарихи ва тахминий таркиблар ҳақида маълумот берилди. Бердиев учун ҳимоядаги муаммолар катта бош оғриғи бўлиши айтилмоқда. Бахтга қарши, дохаликларнинг ҳужум чизиғи ҳам даҳшатли формага кириб олган. Ҳозир шу ҳақда.

Санти Касорла (37 ёш)

"Арсенал"даги ўйинлари билан сизга яхши таниш бўлган испаниялик ярим ҳимоячи "Ал Садд" таркибига бундан 2 йил олдин "Вильярреал"дан келиб қўшилган эди. Сантьягонинг Доха клубидаги ўрни беқиёс. Ҳимоядаги тўпни олдинги чизиққа кўчириш асосан Касорла воситачилигида амалга оширилади. У бугунга қадар қатарликлар либосида 59 учрашувда майдонга чиқиб, ўз номига 28 гол ва 27 та голли узатмани ёздириб қўйган.

Андре Айю (32 ёш)

Францияда туғилган, аммо Гана терма жамоаси шарафини ҳимоя қиладиган ҳужумчи фаолиятининг катта қисмини Франция, Англия ва Туркия чемпионатларида ўтказган. У "Ал Садд" таркибига 2021 йилнинг ёзида келиб қўшилган эди. Юлдузлар лигасининг ортда қолган мавсумида 22 турнинг 21 тасида майдонга тушган Айю 15 та гол уриб, Доха клубининг энг яхши тўпурарига айланди.

Бағдод Бунежа (30 ёш)

Жазоир терма жамоаси форварди Осиёда тўп тепадиган энг кучли марказий ҳужумчилардан бири ҳисобланади. "Ал Садд" сафида 2016 йилдан бери ҳаракатланиб келаётган футболчи ўзбекистонлик мухлисларга яхши таниш. У 2018 йилда "Насаф", 2019 йилда "Пахтакор" дарвозасини ишғол қилган эди. Бунежанинг Қатардаги статистикаси эса шунчаки қўрқинчли: 116 ўйинда 130 гол ва 35 та ассист.

Акром Афиф (25 ёш)

Испан академияларида таҳсил олган футболчи Ла Лигада тўп тепиб, ўзини Бельгияда ҳам синаб кўришга улгурган. "Ал Садд" легионерлари қайд этаётган статистика ҳақида юқорида айтдик. Лекин жамоадаги энг хавфли ўйинчи айнан Афиф ҳисобланади. У Юлдузлар Лигасининг охирги мавсумида 18 ўйин ўтказиб, 13 та гол урди ва 17 бор жамоадошларига шундай имконият яратиб берди.

Бундан ташқари, "аждарлар"нинг мудофаа чизиғи 41 ёшли Родриго Табатадан эҳтиёт бўлиши талаб қилинади. Бир сўз билан айтганда "Насаф"ни жуда қийин синов кутиб турибди. Нима деб ўйлайсиз: Бердиев жамоаси бугун нолга ўйнай оладими?

"Ал Садд" сафидаги "йиртқичлар" ҳақида