"Yutqazdik. Nimadir deyish qiyin. Yomon o'ynadik, birinchi golni keraksiz joyda o'tkazib yubordik. O'zimiz yaratgan vaziyatlarda diqqat, aniqlik etishmadi. "Paxtakor" bilan ochiq o'yin qanday bo'lishini ko'rdik. Raqib haqli ravishda g'alaba qozondi. Etiborliroq bo'lishimiz kerak edi", - deydi Aleksandr Xomyakov.

- "Andijon" ko'pgina uchrashuvlarda ikkinchi raqam bo'lib o'ynaydi. Bugun esa jamoangiz ancha hujumkor futbol namoyish etdi? Bunga sabab nima?

- Raqibning tezkor goli bizni bunday qilishga majbur qildi. O'yinga ikkita reja tayyorlagandik, uchta markaziy himoyachi bilan va ikkita markaziy himoyachi bilan. Rejamiz maydon markazida yaxshiroq harakatlanish va ko'proq to'pni olib qo'yishdan iborat edi. "Paxtakor"ning kuchsiz tomonlaridan kelib chiqib, bunday qarorga kelgandik. Ochiq futbol va natija uchun futbol o'ynash umuman boshqa narsalar. O'z vaziyatlarimizdan foydalanganimizda barchasi yaxshi bo'lardi. "Paxtakor"ga qarshi ochiq o'yin taklif qilish qiyin. So'nggi vaqtlarda to'pga yaxshi egalik qila olyapsiz, ammo bugun to'pni raqibga berib qo'yish va zichroq himoyalanish to'g'riroq bo'lar edi. Keraksiz joyda gol o'tkazib yubordik va barchasi o'zgarib ketdi. Balki, o'zgarishlarda xato qilgandirman.

- Jamoa ikkinchi taymga kuchsizroq bo'lib maydonga tushgandek ko'rindi...

- Muammo o'zgarmayapti. Biz ko'p vaziyatlarda oddiy vaziyatlarda to'pni yuqotayapmiz. To'pga egalik qilishimiz bilanoq darrov hujumga o'tishni boshlaymiz. Bu noto'g'ri, o'yinni boshqarishni bilish kerak. Kerakli pallada hujumga zo'r berish, ayrim bir vaziyatlarda to'pni o'zimizda ko'proq ushlab turish. Biz shoshyapmiz. Jamoa to'pni olib qo'yish uchun ham ko'p kuch sarflamoqda. Biz bugun raqibga ko'p bosim qildik, ammo "Paxtakor" futbolchilarni bizning pressingimizdan osonlik bilan chiqib ketishdi. Jamoam yomonroq o'ynadi demayman, lekin ayrim bir vaziyatlarda sustroq o'ynadik.

- Kubok finalidan so'ng o'yinchilarda futbol o'ynash uchun ishtiyoq qolmadimi? Futbolchilarda motivaciya qolmagandek?

- Qanday qilib yigitlarda motivaciya bo'lmasligi mumkin, musobaqa jadvaliga bir nazar tashlang. Katta ehtimol, bu charchoq alomatlari. Motivaciya yo'q emas.

- “Andijon” jamoasi keyingi mavsum OCHL-2 musobaqasida ishtirok etadigan bo'ldi. Jamoa xalqaro maydon bahslariga qanchalik tayyor deb o'ylaysiz? Tarkib, sharoitlar va boshqa jihatlarni hisobga olgan holda, albatta.

- Oldinda hali 4 ta uchrashuvimiz bor. Keling, shu o'yinlar haqida bosh qotiraylik. Mavsum tugaganidan keyin esa barchasini o'ylab ko'ramiz.

Aleksandr Xomyakov: "Tezkor gol rejamizni o'zgartirib yubordi. Xalqaro maydon haqida o'ylashga hali erta"