Jamoa navbatdagi birinchilikda ham muxlislarini ijobiy natijalar bilan xursand qilish niyatida tarkibga mahoratli futbolchilarni jalb etmoqda. Jamoaning dastlabki xaridlaridan biri Alibobo Rahmatullaev bo'ldi. Kechagi mashg'ulotlardan so'ng Aliboboni suhbatga chorladik.

– Alibobo “Qo'qon-1912” jamoasidagi dastlabki taassurotlaringiz qanday?
– Mana bir necha kundan beri jamoa bilan mashg'ulotlarda ishtirok etyapman. Barchasi ajoyib, ahil jamoa. Murabbiylar shtabi, rahbariyat , futbolchilar hammalariga rahmat. Meni juda iliq qarshi olishdi. O'zi vodiylik yigitlar boshqacha ko'z tegmasin. Qo'qonda ancha o'sish bor. Jamoa oldiga jiddiy maqsadlar qo'yilgan. Mashg'ulotlar ham shunga yarasha o'tmoqda. Yangi murabbiylar shtabining mashg'ulotlari qiziqarli va rang-barang bo'lyapti. Yoshlarga etibor o'zgacha. Jamoadagi sharoitlar ham ajoyib. O'zim ham yaxshi o'yin ko'rsatib, qo'qonlik muxlislarni xursand qilish niyatidaman.

– So'nggi ikki yilda faoliyatingizda pasayish kuzatildi. Bir paytlar “Bunyodkor” jamoasida yorqin o'yinlar ko'rsatgan Aliboboga nima bo'ldi?
– Har bir futbolchining faoliyatida ko'tarilish va pasayish bo'ladi. So'nggi ikki yildagi holatimdan o'zimga yarasha xulosa chiqarib oldim. Qo'qonga yaxshi niyatlarda kelganman. Xudo xohlasa avvalgi holatimdan ham yaxshi o'yin ko'rsatishga harakat qilaman. O'sha milliy terma jamoadan taklif olgan davrimga qaytmoqchiman. Har bir futbolchi kabi mening ham orzuim milliy terma jamoada o'ynab, yurtimiz sharafini halqaro maydonlarda himoya qilish. Buning uchun avvalo Qo'qonda o'zimni ko'rsatishim talab etiladi. Men o'ylaymanki bu vazifani uddalayman.

Akramjon Mamadaliev suhbatlashdi

Alibobo Rahmatullaev: “Qo'qonga o'zimni ko'rsatish uchun keldim”