Namanganliklar O'zbekiston chempionatlari tarixida “Bunyodkor” maydonida ochko olishni uddasidan chiqishmagandi. Bu safar esa muhim bir ochko qo'lga kiritildi.

Uchrashuv yakuniga etgach, Alisher Mahmudov o'yin haqidagi fikrlari bilan o'rtoqlashdi: - Joriy yilgi chempionatdagi ishtirokimiz qoniqarli bo'lmaganligi sababli so'nggi pog'onalarga tushib qolgandik. Oliy ligada qolish masalasini hal etish uchun esa oxirgi ikki turda ochkolarimiz zaxirasini boyitib borishimiz talab etilardi. Shu sababdan “Bunyodkor”ga qarshi o'yinga munosib tarzda hozirlik ko'rishga harakat qildik. Qolaversa, bosh murabbiy sifatida ish boshlagan Ilhom Mo'minjonov ham yigitlarning ruhiyatini ko'tara oldi.

Aynan shu jihatlar sabab “Bunyodkor” maydonida o'zgacha ishtiyoq bilan tushgandik. Buning samarasi yakuni natijada o'z aksini topdi. Aslida yutsak yaxshi bo'lardi. Ammo, kuchli raqib maydonida bir ochkoni qo'lga kiritish ham yomon natija emas. Endilikda, oldimizda turgan so'nggi o'yinda o'zimiz uchun kerakli natijani qayd etib, muxlislarimizni yana bir bor xursand qilish niyatidamiz.

Alisher Mahmudov: “Murabbiy ruhiyatimizni ko'tardi”