Misrga qarshi o'yin terma jamoamizning g'alaba to'pini Anasxon Rahmatov tomonidan kiritildi. O'yindan so'ng Rahmatov bilan suhbatlashdik.

- Biz uchun muhim o'yin edi. Juda ham qiyin o'yinni o'tkazdik. Ikkala jamoaning ham kuchli teng keldi. Kimdir ko'proq vaziyat yarata olsa va gol ura olsa, o'sha g'alaba qozona olardi. Yakunda esa biz o'sha imkoniyatdan foydalanib, g'alabani qo'lga kiritdik. Futzalimiz tarixini yaratishni istagandik. Mana shu istak bilan oxirigacha kurashib, maqsadimizga erishdik.

Misr ustidan qozonilgan g'alaba borasida

- G'alabaga bo'lgan katta ishtiyoq evaziga qo'lga kiritdik. Qolaversa, butun O'zbekiston qo'llab turdi. Oila azolarimizning bizga muxlislik qilib turganligini his qilgan holda maydong tushgan edik. Qanday bo'lmasin, g'alaba qozonib, keyingi bosqichga chiqishni istayotgandik.

Avvalgi o'yinlardagi mag'lubiyatlar xususida

- To'g'risi, Gvatemalaga yutqazib qo'yganimiz chakki bo'ldi. O'yin avvalida hayojon yuzaga keldi. Bu esa natijamizga tasir ko'rsatdi. O'zimiz istagan darajada o'yin namoyish qila olmadik. Qolaversa, raqibimiz juda omadli terma jamoa ekanligini ko'rsatdi. Yaratilgan kichik vaziyatlaridan unumli foydalandi. Rossiyaga yutqazib qo'yganimizga kelsam, raqib kuchli edi. Shunga qaramay, oldindan taslim bo'lganimiz yo'q. So'nggi daqiqalarga qadar kurashib, vaziyatni o'zgartirmoqchi bo'ldik. Baribir tajriba o'z so'zini aytdi. Rossiya bizdan ustunligini namoyish qildi.

Gol urgan vaziyati to'g'risida

- Hisob teng bo'lib turgan vaziyatda bizni yana bir gol urishimiz muhim edi. G'alaba golini urish menga nasib qilgan ekan. To'g'risi, g'alaba to'pini kiritganimdan juda xursandman. Asosiysi, muxlislarimiz va xalqimiz oldida uyatli vaziyatga tushib qolganimiz yo'q. Ularning qo'llab-quvvatlashlarini oqlay oldik. Bu esa mening gol urganimdan ham ko'ra, muhimroq voqea bo'ldi.

Shu o'rinda birinchi bo'lib meni qo'llab turgan ota-onamga rahmat aytaman. Ular meni qiyin vaziyatda ham kayfiyatimni ko'tarib turishdi. Futzalni tanlab, shu darajaga chiqishimda Xurishd aka Tojiboevning hissasi katta bo'ldi. Shuningdek, Bahodir aka Ahmedova Nodir aka Eliboevlarga ham minnatdorchilik bildiraman. Shu insonlarning qo'llab-quvvatlashi bo'lmasa, maydonda hech narsa qila olmasdik.

Keyingi raqib xususida

- Keyingi raqibimiz kim bo'lishini istardim? Menga qolsa, Eron bilan o'ynasak yaxshi bo'lardi. Chunki biz bu terma jamoaga qarshi o'yinlarda doimo yomon natijaga erishganmiz. Jahon chempionatida o'zaro to'qnash kelib, o'zimiz uchun noxush bo'lib kelayotgan seriyaga nuqta qo'yishni istardim.

Anasxon Rahmatov keyingi bosqichga yo'llanma olish, urgan goli va ota-onasidan minnatdorligi borasida