Shuningdek ushbu tadbirda Andijon viloyati futbol federaciya, O'zbekiston futbolini qo'llab-quvvatlash jamoat fondi – Andijon viloyati filiali, sport ko'mitasi rahbariyati ham ishtirok etib, bolalarga bir qator estalik sovg'alarni ulashdi. Uchrashuv avvalida rahbariyat azolari so'z olib, bolajonlarga klub haqida malumot berib, ularni sportning nafaqat futbol turi bilan balki boshqa sport bilan ham shug'ullanishlari uchun keng imkoniyatlar borligini takidlab o'tdi.

Futbolchilar nomidan esa tajribali hujumchi Anvar Berdiev so'z olib, o'z dil izhorlarini bildirdi va millionlar o'yini bilan jiddiy shug'ullanishni ko'zlayotganlarni doimo o'z ustida ishlashi kerakligini takidladi va “Andijon”ning har bir uy o'yiniga tashrif buyurishlarini va qo'llab-quvvatlashga chorladi. Qolaversa “burgutlar”ning tajribali o'yinchilari bo'lgan Sanjar Asqaraliev, Ibrohim Otaxonov va Farhod Bekmuratov ham bolajonlar bilan suhbatda bo'lib bolajonlarni qiziqtirgan savollariga javob berib o'tishdi.

Ularni kelajakda futbolchi bo'lib etishishi uchun mamlakatimizda keng imkoniyatlar yaratilayotganligi haqida aytib o'tishdi. Uchrashuv chog'ida “Andijon” azolari bolalar shaharchasidagi tarbiyalanuvchilarga turli xil sovg'a-salom va sport anjomlarini taqdim qilishdi. Shuningdek, shiringina bolajonlar o'zlari havas qiladigan futbolchilar bilan esdalik uchun suratga tushish imkoniga ega bo'lishdi. O'z navbatida Bolalar shaharachasining rahbariyati va tarbiyalanuvchilari ham so'z olib tadbir ishtirokchilariga hamda “Andijon” futbol klubiga omad tiladilar.

Tadbir davomida professional futbolchilar tomonidan bolajonlarga master-klass o'tkazildi va ikki tarkibga bo'lingan xolda o'zaro o'yin tashkil etildi. Unda 1:1 hisobi qayd etildi. Bizning kelajagimiz bo'lmish bolajonlarni har tomonlama qo'llab-quvvatlash xalqimizning eng ajoyib fazilatlaridan biri.

“Andijon” futbol klubi bu kabi tadbir va uchrashuvlar tashkil etishda davom etadi. Zero, bunday tadbirlardan maqsad farzandlarimizning kelajakda vatanimiz sharafini himoya qiladigan, bayrog'ini halqaro maydonlarda yuqoriga ko'taradigan insonlar bo'lib etishishida oz bo'lsa ham ulush qo'shishdir.

"Andijon" matbuot xizmati

“Andijon” FK azolari bolalar shaharchasiga tashrif buyurdi