Dastlabki turlarda jamoalarning imkoniyatlari tengligi, hali to'liq ritmga tushib olmagani o'yinlarning murosasiz o'tishini taminlaydi. Biz mazkur tur oldidan bir qator qiziqarli faktlarga yuzlanamiz.

OKMK - "Buxoro"

- "Buxoro" Superliga doirasida so'nggi bor 2016 yil Olmaliqda OKMKni mag'lub etgan.

- OKMK oxirgi marotaba raqibiga 2019 yil safarda imkoniyatni boy bergan.

- Jamoalar o'rtasidagi oxirgi 5 ta o'yinda darvozalarga muntazam gol urib kelingan.

- Ulug'bek Bakaev murabbiy sifatida oxirgi martta 2021 "So'g'diyona" boshqaruvida OKMKni taslim qilgan.

"Qizilqum" - "Surxon"

- Termiz klubi 5 yildan buyon "Qizilqum" maydonidan g'alabasiz qaytmoqda. "Surxon"ning safardagi so'nggi 3 ochkosi 2020 yilgi mavsumda qo'lga kiritilgan.

- "Surxon" 3 yildan buyon Superligani g'alabasiz boshlamoqda. Jamoa so'nggi bor 2021 yil mavsumning ilk turida "Metallurg"ga qarshi o'yinda yutuqni tantana qilgan.

"Qo'qon-1912" - "Andijon"

- "Andijon" so'nggi bor Superligada "Qo'qon-1912"ni 2003 yilda mag'lub etishni uddasidan chiqqan. Keyingi 10 ta to'qnashuvning 6 tasi qo'qonliklar foydasiga hal bo'lgan, 4 ta o'yinda tomonlar murosa ko'chasini tanlashgan.

- "Burgutlar" shu paytgacha raqibini safarda bir bor enggan. Jamoaning yagona g'alabasi 1998 yilgi mavsumda qayd etilgan (6:0). Jamoa 21-asrda hali Qo'qonda zafar quchmagan.

- Ikki jamoa 3 yildan so'ng yana Superligada uchrashmoqda. Ular oxirgi marotaba 2021 yil Qo'qonda to'qnash kelgan va durangga imzo chekishgan.

- "Andijon" Superligaga qaytganidan buyon mavsumni mag'lubiyatsiz boshlamoqda. Aleksandr Xomyakov shogirdlari 2023 yil Qarshida "Nasaf"dan ustun kelgan bo'lsa, 2024 yil Olmaliqda OKMKdan bir ochko olib qaytgan.

- "Qo'qon-1912" ikki yillik tanaffusdan so'ng Superligada ishtirokini boshlaydi.

"Bunyodkor" - "Neftchi"

- Farg'onaliklar ketma-ket 3 mavsumdan buyon Superliganing 1-turida 3 ochkoga ega chiqmoqda. 2022 yil "Qo'qon-1912" (1:0), 2023 yil "Metallurg" (3:0), 2024 yil "So'g'diyona" (2:1) ustidan g'alaba qo'lga kiritilgan.

- "Bunyodkor" so'nggi marotaba 2023 yil "Neftchi"dan ustun kelgan edi. O'tgan mavsumdagi 2 ta o'yinda ham farg'onaliklarning qo'li baland kelgan (3:0, 2:1).

"Xorazm" - "Sho'rtan"

- Jamoalar 15 yildan so'ng yana Superligada to'qnash keladi. O'zaro o'yinlardagi so'nggi bahs 2010 yilgi mavsumga to'g'ri keladi. O'shanda g'uzorliklar 4:1 hisobida g'alaba qozongan.

- "Xorazm" Superligada hali "Sho'rtan"ni mag'lub etmagan, 6 ta o'yin 2 ta durang, 4 mag'lubiyat.

- "Xorazm" elitada 15 yildan keyin to'p tepadi. Jamoa 2010 yil Pro ligaga (Birinchi liga) tushib ketganidan so'ng hali Superligada ishtirok etmagan.

- "Sho'rtan" 7 yillik tanaffusdan so'ng yana Superligada o'ynaydi.

"Navbahor" - "Dinamo"

- "Dinamo" bu turda tarixiy g'alabani nishonlashi mumkin. Samarqandliklar Superliga doirasida hali mehmonda "Navbahor"ni mag'lubiyatga uchrata olmagan, 26 ta o'yin 20 mag'lubiyat, 6 durang.

- "Lochinlar" so'nggi bor 2014 yil o'z maydonida ochko yo'qotgan. O'sha o'yin 2:2 hisobidagi durang bilan yakunlangan.

- "Dinamo"ga 10 yildan beri "Navbahor"ni yutish nasib qilayotgani yo'q, Samarqand jamoasi 2015 yil o'z maydonida 3 ochkolik bo'lgan (2:1).

"Nasaf" - "So'g'diyona"

- "So'g'diyona" ketma-ket 4 yildan buyon Qarshidan ochko bilan qaytmoqda. "Nasaf" o'z maydonida 2020 yildan buyon raqibini mag'lubiyatga uchrata olmayapti.

- Berdiev va Boshkovich qarama-qarshiligida ustunlik chernogoriyalik murabbiy tomonida. "So'g'diyona" ustozida 2 ta g'alaba, 2 ta durang va 1 mag'lubiyat bor.

- "Ajdarlar" o'zaro uchrashuvlarda so'nggi bor 2023 yil jizzaxliklar ustidan yutuqni tantana qilgan (2:1).

"Andijon" vodiy derbisida asr g'alabasini qo'lga kiritadimi? "Nasaf" qarshisida noqulay raqib, "Dinamo" startda yana "Navbahor" mehmoni