Futbolchi ushbu yangi chaqiruvni ijobiy qabul qildi va o'zini ko'rsatishga tayyor. Klub matbuot xizmati u bilan intervyu uyurtirdi va bir qator savollarga javob oldi.

- Abinur, "Andijon" klubiga xush kelibsiz. Hammasi qanday sodir bo'ldi?

- "Gomel"dan keyin uyim – Tarazda bo'ldim. Universitetdagi o'qish masalasi bilan shug'ullanayotgandim. Keyinchalik shartnoma imzolash imkoniyati bilan "Andijon" yig'inlarida qatnashish taklifi kelib qoldi.

- Bir necha kundan beri klubning yozgi yig'inida ishtirok etyapsiz. Dastlabki taassurotlaringiz qanday?

- Jamoadagi muhit yaxshi, meni iliq qabul qilishdi, hammasi zo'r ketyapti.

- Sizni "Qozog'istonning Arda Gyuleri" deb atashmoqda. Bu taqqoslash sizga yoqadimi?

- Gyuler bilan taqqoslashlari haqida bilmayman. Qolaversa, u chapaqay, men esa o'ngaqayman.

- Bungacha "Andijon" jamoasi haqida nimalarni bilardingiz?

- O'yinlar sharhini ko'rdim. Har qalay, u erda Belurusdagi sobiq jamoadoshim Rustam to'p tepadi. U menga muxlislar qattiq qo'llab-quvvatlashini takidlab o'tdi. Chindan ham ishqibozlarning tribunadagi zo'r qo'llab-quvvatlashlarini sezdim.

- Darvoqe, o'zingiz uchun raqam tanladingizmi?

- Hozircha tanlaganim yo'q.

- Oldin Belarus chemponatida Rustam Turdimurodov bilan birga o'ynagansiz. Endi u bilan yana bir jamoadasiz. Buni kutganmidingiz?

- Agarda rostini aytsam, hammasi bunchalik tez ro'y berishini sira kutmagandim. Mavsum boshida butun mavsumni "Gomel"da o'tkazishni rejalashtirgan edim.

- O'z oldingizga qanday maqsad qo'ydingiz?

- Hozir butun diqqat-etiborim "Andijon" maqsadlariga qaratilgan, rahbarlar, jamoa murabbiylari qo'yayotgan maqsadlarga etibor qaratganman. Kelajakda esa albatta Qozog'iston milliy terma jamoasi libosida maydonga tushishni istayman.

"Andijon" yangi azosi Abinur Nurimbet: "Kelajakda Qozog'iston milliy terma jamoasi libosida maydonga tushishni istayman"