- Murabbiylar ko'pincha: "Biz har bir o'yinga bir xil tayyorgarlik ko'ramiz", degan gapni takrorlashadi. Bu rostmi? O'zbekiston kubogi finaliga tayyorgarlikda qandaydir farqlar bo'lganmi?

- Mashg'ulot jarayoni va taktika borasida hamma narsa bir xil. Bu erda murabbiylar yolg'on gapirmaydi, bu haqiqat: barcha o'yinlarga chindan ham bir xil tayyorgarlik ko'rish kerak. Raqibni o'rganasiz, uning kuchli va zaif tomonlarini aniqlaysiz, shunga qarab mashg'ulot rejasini tuzasiz. Lekin hissiy jihatdan bu butunlay boshqa daraja. "Andijon" va klub muxlislari uchun ilk bor shunday kuchli hissiyot paydo bo'lgandi. Xuddi shu narsa futbolchilarga ham taalluqli – menimcha, o'sha tarkibdan faqat Vladimir Bubanya O'zbekiston kubogi sohibiga aylangan (2018 yilda OKMK bilan – SA izohi).

- O'yinchilarni qanday ruhlantirdingiz? Balki raqibdan qo'rqmaslik kerakligini aytgandirsiz?

- U erda qo'rqadigan hech narsa yo'q edi: biz finaldan oldinroq Superliga doirasida "Navbahor"ni o'z maydonimizda 3:0 hisobida enggan edik. Hech kim hech kimdan qo'rqmasdi. O'sha to'qnashuv final bo'lishidan tashqari, vodiy derbisi ham edi. Shuning uchun futbolchilarni qo'shimcha ruhlantirish shart emasdi. Ichimizda his-tuyg'ular jo'sh urardi. Jamoa "kuyib ketishi"dan juda xavotirda edik. Ammo futbolchilarning ko'zlaridan o'yinga tayyor ekanliklari sezilib turardi. Finaldan uch kun oldin Aleksandr Xomyakov bilan gaplashib oldik. U: "Matbuot xodimimiz qani? Keling, final oldidan ota-onalar, qarindoshlar, rafiqalar, bolalarning tilaklarini videoga muhrlaymiz. Faqat bu haqda futbolchilar bilmasin", dedi.

"Andijon" matbuot xodimi Shuhrat juda yaxshi ish qildi. Ko'plab kichik videolar tayyorladi, keyin ularni birlashtirdi. Video o'yindan ikki kun oldin tayyor bo'ldi, ko'rdim – juda tasirli chiqibdi. O'yindan bir kun oldin nazariy mashg'ulotda "Navbahor"ning himoyadagi o'yinini tahlil qildik. Mashg'ulot oxirida chiroqni o'chirib, katta ekranda o'sha videoni qo'ydik. Bu o'yinchilarga juda qattiq tasir qildi, garchi uncha hissiyotli odam bo'lmasam-da, hattoki men ham tasirlandim. O'ylaymanki, bu bizga ham malum darajada yordam berdi.

Artyom Petrosyan ishtirokidagi "Fint To'raeva" podkastining to'liq versiyasi bilan quyidagi havola orqali tanishishingiz mumkin (rus tilida):

"Andijon"ning sobiq murabbiyi jamoa o'tgan yili O'zbekiston kubogi finaliga qanday tayyorgarlik ko'rganini aytdi