Yaxshi bilasiz, o'tgan mavsum yakunlariga ko'ra "Andijon" oliy ligani tark etgandi. Biroq PFL qaroriga binoan jamoaga yana imkoniyat berildi va elitada olib qolindi. "Andijon"ni Edgar Gess boshqarayotganidan xabaringiz bor. Edgar Yakovlevich ayni paytda tajribali o'yinchilar atrofida jamoa tuzishga harakat qilyapti. Kechagi bahsda ham oliy ligada nomi chiqqan futbolchilardan bir nechtasi ishtirok etdi.

Kechagi o'yinda "Andijon"ning asosiy tarkibi quyidagicha ko'rinishda bo'ldi. Darvozani moldovalik posbon Aleksandr Moshnyaga qo'riqladi. Himoya markazida Yaroslav Krushelnickiy bilan Davron Tursunov, chap qanotda Ibrohim Otaxonov, o'ng qanotda esa Asror Rahmonov harakat qilishdi. Yarim himoyada Sanjar Asqaraliev, Asqar Jadigerov, Iqbol Akramov, Timur Vasilev, Shukur Jumaboev singari ftubolchilar to'p tepdi. Hujumda esa Lochin Soliev o'ynadi.

Keyinchalik ikkinchi taymda Rustam Azamov, Ernest Sedko, Aziz G'ulomxo'jaev, Akbar Xo'jaev kabi o'yinchilar maydonga tushishdi. Asosiy tarkibga razm solib qarasak, o'tgan mavsum o'ynagan futbolchilardan faqat Davron Tursunov, Ibrohim Otaxonov, Asror Rahmonov va Lochin Soliev qolibdi.

Har qanday jamoaning "miyasi" hisoblanadigan yarim himoya "Andijon"da tubdan yangilangan. Aslida yarim himoyachi hisoblanadigan Ibrohim Otaxonov kecha chap qanot himoyasida o'ynadi. Natijada yarim himoyada faqat yangilar harakat qilishdi. Bizga malum bo'lishicha, Edgar Gess Andijonga borganidan so'ng klub bilan besh yillik shartnoma tuzgan va etiborni asosan mahalliy yoshlarga qaratishi aytilgandi. Biroq hozircha buning aksini ko'ryapmiz. Va bunga tabiiy hol sifatida qarsak ham bo'ladi, negaki Gess qaysi jamoada ishlamasin, urg'uni doim tajribali futbolchilarga bergan.

Shundan kelib chiqib aytganda, bu yil yoshlarni tarbiyalaydimi-yo'qmi, bir narsa deyish qiyin, chunki murabbiy jamoani Krushelnickiy, Jadigerov, Asqaraliev kabi futbolchilar atrofida tuzishga harakat qilyapti. Qolaversa, yarim himoya deyarli 100 foizga yanginayotganini hisobga olsak, yangi futbolchilarning bir-birini tushunib ketishiga qancha vaqt kerak bo'ladi, jamoa o'yinini kuchaytirish uchun murabbiyga vaqt etadimi kabi savollar ham yuzaga kelaveradi. Oliy liga boshlanishiga esa tobora oz vaqt qolyapti.

X.Xoliqov.

"Andijon" o'yinida o'sish kuzatiladimi?