Унга ўйиннинг энг яхши футболчиси Сардор Мирзаев ҳамроҳлик қилди.

"Рақибга ҳеч бир жабҳада ютқазмадик. Хато оқибатида гол ўтказиб юбордик. Сўнгги дақиқаларда гол уриб дурангга эришдик, ғалабани кўзлагандик, аммо дурангдан ҳам хурсандмиз. Барча мухлисларга катта раҳмат айтмоқчиман. Биз бир жамоага айланиб бораяпмиз. ОЧЛда осон ўйинлар бўлмайди, кейинги баҳсларда ғалабага ҳаракат қиламиз", - дейди Микляев.

"Бугунги ўйинда келиб бизни қўллаб турган барча мухлисларга раҳмат айтаман. Ўз уйимизда бўлгани учун бироз ҳаяжонландик. Кейинги ўйинларда керакли натижага эришишга ҳаракат қиламиз", - дейди Мирзаев.

- Бугунги ҳакамлик ҳақида нима дейсиз?
- Ҳакам барчасини тўғри бажарди. Қоидаларга риоя қилди. Аммо "Локомотив"га ён босгани йўқ.

- Кападзени ўнг қанотда ўйнатиш нима билан боғлиқ? Ҳасанов тайёр эмасмиди?
- Жасур Ҳасанов мавсумолди йиғинлар пайтида жароҳат олганди. Шу боис ҳали 90 дақиқа ўйнашга тайёр эмас эди. Кападзенинг эса майдонга тушганининг ўзи жамоага устунлик беради.

- Нега биринчи бўлимда кўп ҳужумлар қанотлардан ташкил этилди? Марказдан ҳужум қилинганда хавфли вазиятлар ташкил этишда устунлик кўзга ташланди.
Сардор Мирзаев: - Мураббийларнинг кўрсатмасига биноан қанотлардан ҳужум қилдик. Иккинчи бўлимда Ҳасанов тушгач қанотлар янада кучайди.

- Бугун Алибоев ўйнамади, Жасур Ҳасанов қизил карточка олди. Бир ҳафтадан сўнг Саудия Арабистонида ўйин. Йўқотишлар кўп эмасми?
- Ҳозир ўйин эндигина тугади. Эртадан навбатдаги баҳсга тайёргарликни бошлаймиз. Менимча Алибоев жароҳатидан қутулади ва сафардаги ўйинда майдонга туша олади. Ҳасановнинг ўрнини боса оладиган футболчилар ҳам бор.

Нарзулла Сайдуллаев

Андрей Микляев: "Ал Иттиҳод" биздан кучли ўйнагани йўқ"