"Bugun erta gol o'tkazib yubordik va futbolchilarimiz go'yoki charchab qolishgandek ko'rinishdi. Yagona o'yin taqdirini hal etdi. "Paxtakor" jamoasini g'alaba bilan tabriklayman", - deya fikr bildirdi Anvar Berdiev bugungi uchrashuv haqida.

- "Sho'rtan"ga vaziyatlarni yaxshi yakunlay oladigan hujumchi etishmayotgandek...

- Biz o'z imkon darajamizdan kelib chiqib futbolchilarni taklif etdik. Futbolchilarimizga o'ziga bo'lgan ishonch etishmayotgandek. Futbolchilarimiz hali yosh va keyingi uchrashuvlarda kamchiliklarni to'g'rilaymiz. Keyingi uchrashuvlarni G'uzorda o'tkazamiz.

- Jamoangiz bugun faqatgina qanotdan oshirilgan paslar orqali hujum qildi, raqib darvozaboni esa bunday paslarni osonlik bilan bartaraf etdi. Aynan mana shunday vaziyatda jamoaga lider etishmagandek tuyuldi...

- Vaqt kam qolgani uchun futbolchilarimiz shoshib qolishdi. Shaxsan men ham bunday futbol o'ynashga qarshiman. Ustiga-ustak yigitlar charchab qolishdi ham. Gapingiz to'g'ri, uzun paslar raqib darvozaboniga qulaylik yaratib berdi.

- Bugun "Paxtakor" omad evaziga g'alaba qozondi deb o'ylaysizmi?

- Omad ham kuchlilarga kulib boqadi. O'tgan turda "Paxtakor" eng kuchli jamoalardan biri "Neftchi"ni safarda yirik hisobda mag'lub etib keldi. Aytganimdek, futbolchilarimizga biroz ishonch etishmadi.

Anvar Berdiev: "Futbolchilarimizda o'ziga bo'lgan ishonch etishmadi"