- Kurashuvchan o'yin bo'ldi. Chunki ikkala jamoa ham pley-off vazifasini bajarib bo'lgandi. Durangni adolatli natija deb o'ylayman. "Qo'qon-1912" jamoasiga 4 dekabr kungi o'yinda omad tilayman.

- Pley-offda qaysi raqib tushishini istaysiz?

- Kim bilan bo'lishidan qatiy nazar, o'ynashimiz kerak. Chunki Superligada oddiy jamoaning o'zi yo'q. Lekin Pro-ligadagi jamoalarning imkoniyati balandroq, chunki ular o'z maydonlarida o'yinlarni qabul qilishadi. Shu sababli jamoalar harakat qilib, o'z vazifasini bajarsa bo'ladi.

- Yil boshida nimalarni kutgandingiz, nimalar o'xshadi-yu, nimalar amalga oshmadi?

- Yigitlarning kichik vaziyatlarda etiborni yo'qotgani uchun ko'p o'yinlarda mag'lubiyatga uchradik. Endi bu ustida ko'proq ishlashimiz kerak. Pro-ligada o'tkinchi o'yinning o'zi yo'q, har bir bahs qiyin o'tdi. Ikki yildan beri pley-off bahslarida ishtirok etyapmiz. Yildagi barcha harakatlarimizni aynan shu o'yin ko'rsatib beradi.

- Bu yil Qashqadaryo uchun omadli bo'ldi. Superliga va Pro-ligada Qashqadaryo viloyati vakillari peshqadamlik qilishdi. Bunga nima sabab deb o'ylaysiz?

- Bu mavsum Qashqadaryo klublari uchun zo'r o'tdi. "Nasaf" va "Mashal"ni tabriklayman. Bizda ham imkoniyat bor. Ozgina imkoniyat uchun ham kurashamiz. Agarda Superligaga chiqsak, Qashqadaryo futboli uchun katta yutuq bo'ladi. Chunki bu erda futbolga etibor katta, muxlislar ham jamoalarni qo'llab-quvvatlaydi. Muxlislar "Nasaf"ni, "Mashal"ni yaxshi ko'rishadi. "Sho'rtan"ni ham eski muxlislarimiz ham qo'llab-quvvatlamoqda.

Anvar Berdiev: "Pley-offda kim raqib bo'lishidan qatiy nazar o'ynashimiz kerak"