"Nasaf" jamoasini qanday kuchga ega ekanligini hamma yaxshi biladi. O'ylaymanki, yigitlar bugun maydonda borlarini berib harakat qilishdi, umuman olganda kuchli raqibga qarshi yomon o'yin o'tkazmadik.

O'zi qura vaqtida xavotirda edik, "Nasaf" yoki "Bunyodkor" kabi kuchli raqiblar bilan tushib qolishdan cho'chigandik. Chunki bilasizlar, bu jamoalarda aksariyat yosh futbolchilar o'ynaydi, to'p uzatishlarini maromiga etkazishadi. O'ylaganimizdek, qura natijasiga ko'ra "Nasaf" bilan tushib qoldik. Bilasizlar, bu jamoa futbolchilari kuchli, jamoa bosh murabbiyi ham o'zbek futbolida o'z o'rniga ega, ularni bugungi g'alaba bilan tabriklaymiz.

Bizdagi asosiy maqsad - Superliga yo'llanmasini qo'lga kiritish, shu maqsad yo'lida astoydil harakat qilishda davom etamiz. Bugungi o'yinda kamchiliklarimizni ko'rib oldik.
Hakamlik haqida? Hakamlar ishini muhokama qilmoqchi emasman, ularni ishiga baho beradigan hakamlar qo'mitasi bor, ular uchrashuvni ko'rib chiqib xulosa qilishadi.

Ikkinchi taymda o'yinimiz kuchaydi? Buni sababi "Nasaf" jamoasi ikkita gol urib olgach, ozgina xotirjamlikka berildi va bizda imkoniyatlar yuzaga kela boshladi. Bundan tashqari bizda ortga yo'l qolmagandi, shu sabab butun jamoa bo'lib hujumga o'tdik. Ikkinchi bo'limda bitta gol urdik, ikkinchisiga vaqt va qaysidir manoda omad ham etishmadi. Bugun jamoamiz yigitlarini "Nasaf" nomi ozgina hayajonga soldi shekilli, ular o'yinga moslashib olgunga qadar bir oz qiyinchilikka duch kelishdi, aslida har qanday jamoaga qarshi o'ynasa bo'ladi.

Ikkinchi davrada jamoamiz bosh murabbiyi bilan kuchaytirish lozim bo'lgan chiziqlar to'g'risida muhokama qilib olamiz. Albatta ko'z ostimizga olib qo'ygan futbolchilar bor, nasib qilsa ularni tarkibga jalb etamiz, qachon shartnoma imzolasak, ana o'shanda rasman elon qilamiz.

Bekzod Tolibov yozib oldi

Anvar Berdiev: "Qurada "Nasaf" yoki "Bunyodkor" kabi kuchli raqiblar bilan tushib qolishdan cho'chigandik"