Ниҳоят, терма жамоалар ўйинлари тугади ва АПЛ яна биз билан!

Бешинчи тур 3 кун давом этади ва ҳар куни энг зўр тўқнашувлардан бир нечтаси ўтказилади.

Унинг превьюсига ўтишдан аввал, тўртинчи тур воқеаларини хотирлаймиз:

Биринчи кун "Челси" ва "Эвертон" ўз учрашувларида ғалаба қозонишди, "Саутгемптон" умуман ожиз "Вест Бромвич"ни мағлуб этди ва "Лидс" "Манчестер Сити" билан дуранг ўйнади.

Иккинчи кун ҳайратланарлироқ кечди. "Тоттенхэм" "Манчестер Юнайтед"ни меҳмонда 6:1 ҳисобида тор-мор этди, "Вест Хэм" сафарда "Лестер"ни уятга қўйди – 3:0 (ғалаба). Барчани ақлдан оздирган ўйин "Астон Вилла" – "Ливерпуль" ўйини бўлди: 7:2. Даҳшат! Хуллас, буларнинг барини унутишнинг иложи йўқ. Демак, "кейинги бекат" – бешинчи тур!

Турнинг асосий интригалари

Бэйлнинг қайтиши

Гарет Бэйл "Тоттенхэм"га қайтди – бу ғалабами ёки носталжик утопия? Бу саволга ҳали бизда жавоб йўқ. Тахминчилар уэлслик футболчининг бир йилдан кўпроқ вақтдан бери футбол ўйнашдан воз кечиб, бошқа спорт турини афзал кўрганига ишора қилмоқдалар. Қарама-қарши томон эса футболчи ўзининг юлдузли онларига қайтишига ишоняпти.

"Тоттенхэм"дагилар Бэйл албатта, иккинчи ёшлигини ўтказади, деган фикрда. Лондонлик инсайдерларнинг фикрига кўра, клуб ўйинчининг машғулот жараёнидаги иштиёқидан мамнун.

Ҳар қандай ҳолатда ҳам барча жавобларни футбол майдонидаги "чиқиш" кўрсатиб беради. Моуринью Бэйл якшанба куни "Тоттенхэм" сафида дебют қиладими ёки йўқми деган саволга ноаниқроқ бўлса-да, жавоб берди.

"Ҳа, эҳтимол бу якшанба куни содир бўлиши мумкин, агар ундай бўлмаса, унда пайшанба куни", – деди португалиялик Европа Лигаси доирасидаги ЛАСКга қарши ўйинга ишора қилиб.

"Манчестер Сити" ғалабалар "таъми"ни эслайдими?

Гвардиола жамоалари Рожерснинг "Лестер" жамоаси тарихий ютуқни қўлга киритмагунча, ҳеч бир лигада битта ўйинда бешта гол ўтказиб юбормаган. "Лидс"га қарши ўйин ижобий ўтмади, бу ўйинда ҳам, натижада ҳам тўлиқ акс этди. Пеп жамоаси "Aрсенал"га қарши ўйинда AПЛнинг кетма-кет учинчи ўйинида ғалабасиз қолиш хавфи бор ва бундай натижанинг эҳтимоли жуда катта. Гвардиоланинг айтишича, Кевин де Брюйне ва Габриэл Жезус майдонга тушмайди. Серхио Агуэро ўзининг ушбу мавсумдаги биринчи учрашувини ўтказиши сўроқ остида қолмоқда.

Гвардиола битта муаммоли позициядаги "тешик"ни ёпиши биланоқ, бошқасида янги "туйнук" пайдо бўладиганга ўхшайди. Улар мудофаа учун жуда катта миқдордаги маблағни сарфладилар ва шундан сўнг ҳужумда инқироз бошланди. Ва ҳатто дунёдаги энг бой футбол клубларидан бири ҳам бу муаммони ички ресурслар ёрдамида ҳал қила олмаяпти. Aгар "Манчестер Сити" очко йўқотишда давом этса, ҳайрон бўлманг.

"Лидс" – "Вулверхэмптон" учрашуви

"Лидс" ўзини Премьер-лиганинг янги аъзоси сифатида тутмаяпти. Минимал вазифани бажариб, шунчаки юқори лигада ўз ўрнини сақлаб қолиш? Йўқ, бу Марсело Бьелсага тегишли эмас.

Бьелса шогирдлари "Ливерпуль" билан ҳазилакамига кураш олиб боришмади (3:4), "Фулхэм" билан "отишма" содир бўлди (4:3), "Шеффилд Юнайтед"ни енгишди (1:0) ва мўжиза туфайли "Ман Сити"дан ғалабани тортиб олишмади (1:1). Натижада ҳозир 7 очко билан саккизинчи ўринда боришмоқда.

"Вулверхэмптон" ўзининг беқарорлиги билан ажаблантирмоқда. "Бўрилар" иккита ғалаба ва шунча мағлубият билан мувозанатни сақлаб туришибди. Нуну Эшпириту Санту ҳозирча ушбу кўрсаткичларни бир тарафга оғдиришга муваффақ бўлмади. "Лидс"га ташриф эса вазиятни яхшилаш учун энг яхши вақт эмас.

"Ман Сити" – "Aрсенал" ва "Эвертон" – "Ливерпуль" каби учрашувлар фонида "Лидс" – "Вулверхэмптон" тўқнашуви бироз "хира" кўринади, аммо ишонинг, бу алоҳида эътиборга лойиқ учрашувдир.

1:6 ва 2:7 дан кейин нима гаплар?

Биз "Ливерпуль" ҳақида алоҳида гаплашсак бўлади, аммо Клоппнинг "Астон Вилла" билан ўйиндан кейин айтган сўзларига эътибор бермаслик мумкин эмас. Немис мағлубиятдан кейинги кечада унга осон бўлмаганлигини тан олди.

Эрталаб у футболчилар билан гаплашиши кераклигини тушунди ва уларга хабар ёзди.

"Шундан сўнггина мен ўзимни анча яхши ҳис қилдим, энди фақат олдинга боришимиз керак. Биз буни енгиб ўтиш учун етарли вақтга эгамиз. Албатта, ҳеч қачон ютқазишни хоҳламайсиз, айниқса, 2:7 ҳисобида ютқазгандан сўнг, сиз ўзингизни янада ёмонроқ ҳис қиласиз, лекин баъзида бу фойдали бўлиши мумкин ва биз шундай эканлигини тасдиқлаб, исботлашимиз керак" – Юрген Клопп.

Сўнгги йилларда "Ливерпуль"да ишлар шунчалик яхши кетяптики, "Астон Вилла"дан учралган 2-7 ҳисобидаги мағлубият тасодифга ўхшайди. "Тоттенхэм"га 1-6 ҳисобида ютқазган "Манчестер Юнайтед" клубига эса бу доимий инқирозининг бир қисми сифатида қаралмоқда.

Сульшерни танқид қилиш ҳар бир чегарани ёриб ўтиб кетади. "Нега кекса Кавани сотиб олинди?", "Магуайр яна муаммога дуч келиб, Англия зарарига ярим соат ичида иккита сариқ карточка ишлаб олди", "норвегиялик мураббий ва Бруну Фернандеш ўртасидаги муносабат яхши эмас" ва ҳоказо.

Юқоридаги ёзувларнинг барчаси шуни кўрсатадики, МЮда ҳали ҳаммаси яхши эмас. "Ньюкасл" билан ўйинда манкунианларнинг ишончли ғалабасига ишониб бўлмайди.

"Эвертон" – "Ливерпуль" (17.10 16:30)

"Эвертон" ҳар доимгидан ва "Ливерпуль"данда яхши ҳолатда. Табиийки, "Ливерпуль"нинг "қоқилиши" жамоанинг чуқур инқирози ҳақида ўйлашга мажбур қила олмайди, бироқ ҳимоядаги муаммолар... Чемпионлар июндаги чемпионат рестартидан бери ўз дарвозаларидан 23 та тўп олиб чиқишди. Худди шунча муддатда Премьер-лига клублари орасида фақат иккита жамоа кўпроқ гол ўтказиб юборди – "Кристал Пэлас" (25 та) ва "Брайтон" (24 та).

Шу билан бирга, "Эвертон" "Тоттенхэм" ва "Лестер" қатори мавсум бошидан буён АПЛда энг кўп гол урдилар. Эҳтимол, "ирислар" ўтган ўн йил ичида биринчи марта дербида ғалаба қозониш учун энг яхши ҳолатда туришибди.

"Челси" – "Саутгемптон" (17.10 19:00)

Октябрь ойи бошида Кепадан футбол майдонидаги ўз ўрнини йўқотишига қандай тоқат қилмоқчи эканлиги ҳақида сўрашди. Испаниялик дипломатик тарзда у адолатли рақобатга тайёрлиги ва ўз мақсадига эришишини таъкидлади. Бир кун ўтиб, Эдуард Менди жароҳат олди. Тасодифми?

Сенегаллик дарвозабон терма жамоа ихтиёридан жароҳат олиб қайтди ва энди бир неча ҳафта давомида тикланиб боради. Лэмпард Зиеш ва Пулишичнинг охиригача тикланишини кутиб турган бир пайтда, унда янги муаммолар пайдо бўлди. Мендидан ташқари Чилуэлл термадан жароҳат олиб қайтди. Тиаго Силва ҳам ёмон ҳолатда етиб келди. Лондонликлар мураббийи Н'Голо Кантени дўстининг тўйига қўйиб юбормади. Матбуот дарҳол бу ҳақда ёзишни бошлади – "француз клубни тарк этади, у мураббий билан зиддиятга борган". Франциялик ярим ҳимоячи, албатта, зиддиятли одамлардан бири эмас ва шунга қарамай, муҳит ёқимсиз бўлиб қолди. Лэмпард барча йўқотишларни ҳисобга олган ҳолда кимни асосий таркибда майдонга тушириш ҳақида ўйлаши керак.

"Саутгемптон" танаффус пайтида таркибни Тео Уолкотт билан кучайтиришга муваффақ бўлди. Шунингдек, франциялик ярим ҳимоячи Ибрагим Диалло ҳам жалб қилинди.

Маълумот учун, "Челси" "Саутгемптон"ни сўнгги ўнта ўйиндан еттитасида мағлуб этган.

"Манчестер Сити" – "Арсенал" (17.10 21:30)

"Манчестер Сити"нинг кадрлар билан боғлиқ асосий муаммоларини айтиб ўтган эдик. "Арсенал"нинг жароҳат олган "армияси" ҳали ҳам бўш эмас – Мари, Мустафи, Мартинелли, Чемберс ва Смит-Роу ўйиндан ташқари ҳолатда. "Канонирлар"да Обамеянг ҳақида хавотир бор эди, чунки у терма жамоанинг ихтиёрида енгил жароҳат олди. Аммо ҳаммаси изига тушди ва габонлик аллақачон жамоа билан машғулот ўтказган.

Лондонликлар билан боғлиқ асосий интрига — бу Партининг дебют қилиш-қилмаслиги. Ярим ҳимоячи узоқ вақтдан кейин қатъият билан "тўпчи"га айланди. Барча ихлосмандлар ярим ҳимоячини Премьер-лига доирасидаги баҳсда кўришни кутиб ўтиришибди. "Арсенал" сўнгги учрашувда "Ман Сити"ни мағлуб этди, бироқ бу Англия кубоги эди. Чемпионат – бу бутунлай бошқа масала. "Канонирлар" АПЛда кетма-кет 6 та учрашувда "шаҳарликлар"га ютқазишган. Сўнгги ғалаба беш йил олдин содир бўлган.

Балки "Манчестер Сити"нинг ҳужумдаги муаммолари ва Артета бошчилигидаги "Арсенал"нинг ўйин даражаси ошганини ҳисобга олиб, меҳмонлардан қандайдир ишончли натижа кутсак бўлади. Хуллас, бурчасини ўйин кўрсатади, кутамиз.

"Ньюкасл" – "Манчестер Юнайтед" (17.10 23:59)

Стив Брюс ўйиндан олдин "Манчестер Юнайтед" билан хоҳлаган пайтда учрашишни исташини, аммо "Тоттенхэм" билан мағлубиятдан кейин буни хоҳламаслигини айтиб ўтди. Мураббийининг сўзларида мантиқ бор, чунки топ-клублар юзларига "тарсаки" қабул қилиб олганларидан кейин ўзларини мухлислар олдида оқлашга астойдил интилишади. Балки халқаро ўйинлардан сўнг қасос олиш ҳисси сусайгандир ва кадрлар билан боғлиқ муаммолар мавжудлигини инобатга олмаса, "Ньюкасл"да имконият бор. Лонгстафф, Кларк ва Дамметт ўйнашга тайёр, аммо Сент-Максимен, Йедлин, Лассельс ва Льюис шубҳа остида. "Манчестер Юнайтед" ҳам етарлича нюансларга эга. Теллесда дебют қилиш имконияти мавжуд. Ҳали ҳам карантинда бўлиб турган Кавани эса ўйнамайди. Марсьяль дисквалификация туфайли иштирок этмайди, Магуайрнинг майдонга тушиши номаълум масала.

"Ньюкасл" "Манчестер Юнайтед"ни ўз уйида мағлуб этишни ўрганди. Уларнинг сўнгги учта уйинидан иккитаси мезбонлар фойдасига бўлди. Меҳмонлар яна очко йўқотишса ажабланмаймиз.

"Тоттенхэм" – "Вест Хэм" (18.10 20:30)

"Тоттенхем" Бэйлнинг дебютини кутмоқда, "Вест Хэм" эса сўнгги лаҳзада "Брентфорд"дан Саид Бенрахмни трансфер қилди. Ҳозирча фақат ижарага ва ўйиндан бир кун олдин. Сўнгги турда икки жамоа ҳам барчани ажаблантирди. "Вест Хэм" ўтган мавсум турнир жадвалида юқори поғоналарни эгаллаган клубларни "ғажиб ташламоқда". Улар дастлаб, "Вулверхэмптон"ни (4:0), сўнгра "Лестер"ни мағлуб этишди (3:0).

"Тоттенхэм" биринчи турда "Эвертон"га ютқазгандан бери мағлуб бўлмади. "Вест Хэм" ҳам ўз вазиятини ўнглаб олди – жамоалар турнир жадвалида бир очколик фарққа эга.

Моуринью Дайердан фойдалана олмаса керак, унинг ўрнига Тоби майдонга тушиши кутилмоқда. Бундан ташқари, Ло Чельсо ва Бергвейннинг иштироки ҳам шубҳа остида. "Вест Хэм"да катта йўқотиш йўқ.

"Тоттенхэм" "Вест Хэм"га қарши охирги 10 та учрашувидан атиги 5 тасида ғалаба қозонган. Ҳозирги кунда Кейн, Бэйл ва Сон соғ-саломат ва улар ғалабани ташкил этишга қодирлар.

Шунингдек, ушбу турда қуйидаги ўйинлар бўлиб ўтади:

18.10 16:00 "Шеффилд Юнайтед" – "Фулхэм"

18.10 18:00 "Кристал Пэлас" – "Брайтон"

18.10 23:15 "Лестер " – "Астон Вилла"

19.10 21:30 "Вест Бромвич" – "Бёрнли"

19.10 23:59 "Лидс " – "Вулверхэмптон"

Шерзод Нурматов тайёрлади.

Eplmanager.com. Бугун "League №10" совринли лигаси старт олади

АПЛ. "Эвертон" – "Ливерпуль", "Ман Сити" – "Арсенал” ва бошқа баҳслар учун превью