"Liverpul" – "Tottenxem"
11.02.2017, 22:30
"Enfild Roud"
Bosh hakam: Entoni Teylor (Manchester)

Premer-liga 25-turining markaziy o'yinida "Liverpul" jamoasi "Tottenxem"ni qabul qiladi. "Qizillar" 2017 yilni juda yomon boshlashdi. Klopp shogirdlari oxirgi beshta turda g'alaba nimaligini bilishmadi. Ularda gohida asosiy tarkib o'yinchilari jarohat olishsa, gohida boshqa bir sabablarga ko'ra o'ynay olishmadi.

"Shporlar" esa oxirgi 11ta o'yindan to'qqiztasini o'z foydalariga hal qilishgan va ikki bor durang o'ynashgan. Pochettino shogirdlari hozir yaxshi formadalar.

"Liverpul" safida Lallana, Lovren va Klavanlar so'nggi mashg'ulotlarni o'tkazib yuborishdi. Katta ehtimol bilan bugun ular maydonga tushishmaydi. Ayniqsa, markaziy himoyadagi muammolar Kloppga qiyinchilik tug'dirishi tayin. Markazda Matip bilan birga Leyvaning tushish ehtimoli yuqori. Oldinda Mane, Koutino, Firmino uchligi harakat qiladi.

Tarkibdagi yo'qotishlar borasida "shporlar" ham yaxshigina aziyat chekishgan. Asosiy himoyachilar Yan Vertongen va Denni Rouzlar jarohat tufayli o'yinni o'tkazib yuborishadi. Vertongenning jarohati 3ta markaziy himoyachi taktikasini 4-2-3-1 sxemasiga o'zgartirishga sabab bo'ladi. Bunda mrakazda Alderveyreld va Dayer o'ynasa, qanot himoyasida Uolker va Devis to'p tepadi.

Qiziq:

- Ayni paytda "Liverpul" APLda "Tottenxem"ga oxirgi 8ta o'yinda yutqazmagan (5 g'alaba, 3 durang);
- Ushbu qarama-qarshilikda Premer-ligada jami 9ta avtogol qayd etilgan. Bu chempionatda o'zaro o'yinlardagi eng ko'p avtogol urilgan juftlik;
- "Tottenxem" jamoasi "Enfild"ga uyushtirgan 24ta safaridan 15tasida engilgan va faqat ikki marta g'alaba qozongan (2 g'alaba, 7 durang, 15 mag'lubiyat).

Taxminiy tarkiblar:

"Liverpul": Minole, Klayn, Matip, Leyva, Milner, Veynaldum, Xenderson, Jan, Mane, Koutino, Firmino.

"Tottenxem": Loris, Uoker, Dayer, Alderveyreld, Devis, Vanyama, Dembele, Son, Eriksen, Alli, Keyn.

O'ynamaydi: Ingz, Gruyich, Eydjariya - Lamela, Vertongen, Rouz, Tripper.
So'roq ostida: Lovren, Klavan, Lallana (hammasi "Liverpul").

Murabbiylar fikrlari:

Yurgen Klopp ("Liverpul"): "Albatta, 5:0 hisobidagi g'alabadan keyin o'yinni tahlil qilish oson va qiziq, lekin men "Xall Siti"dan uchralgan mag'lubiyat sababini topdim. Birinchi bo'limda biz juda yomon o'ynadik, aslida esa bunday qilmasligimiz kerak. Ortga qarashga vaqt yo'q, jamoa yangi bellashuvni o'tkazishi kerak, biz "Tottenxem"ga qarshi tayyor bo'lishimiz kerak".

Maurisio Pochettino ("Tottenxem"): "Liverpul" bilan o'yin huddi "Midlsbro" va boshqa klublarga qarshi uchrashuvlar kabi muhim. Chunki, har safar uch ochko uchun kurash olib boriladi. So'zsiz, bu hal qiluvchi o'yin bo'lmaydi, oldinda hali ancha tur bor. Agar g'alaba qozonsak, o'z joyimizni saqlab qolamiz va "Chelsi"ga bosim o'tkazishda davom etamiz. Maqsadimiz - etakchi bilan farqni qisqartirish".

Angliya Premer-ligasi turnir jadvali >>> APL

Tolibjon Qosimov

Eplmanager.com saytida bugun yangi sovrinli liga ishga tushdi. Jamoa tuzing va sovrinlarni yutib oling. Jamoa tuzishga o'tish

APL. "Liverpul" – "Tottenxem" o'yiniga bag'ishlangan prevyu