Xususan, futbolchimizning "Manchester Siti"ga yo'l olishiga xorij ommaviy axborot vositalari, mutaxassislar munosabatlarini bildirmoqda. Biz ham bu borada o'zimizning mahalliy murabbiylarimizning fikrlariga quloq tutdik.

Xayrulla Karimov (OKMK fitness murabbiyi, O'zbekiston terma jamoasi sobiq futbolchisi) - To'g'risi bundan juda xursand bo'ldim. Abduqodirni o'yinlarini anchadan buyon kuzatib kelaman. APLda o'z o'yinlarini ko'rsatib ketishiga tilakdoshman. Uning salohiyati juda yuqori. Gvardiola dunyoning eng zo'r murabbiyi. Bunday murabbiyning qo'liga tushishning o'zi katta baxt. "Manchester Siti" yanada o'sishi uchun yaxshi imkoniyat deb o'ylayman. Ular ham o'zimizga o'xshagan odamlar, kosmosdan tushib qolmagan. Shu bois bu erda ortiqcha bosim, havotirni o'ylashga hojat yo'q. Inson qilgan ishni inson qila oladi. Yangi chempionatga tezda ko'nikib ketadi va o'z odobi bilan ko'p narsaga erishadi. Istardimki, bu ish yanada xayrli bo'lib O'zbekistondan ko'plab futbolchilar kuchli chempionatlarda to'p tepishsin.

Server Jeparov (O'zbekiston terma jamoasi sobiq sardori) - Abduqodir o'z mehnati bilan jahonning eng buyuk jamoasiga borishga munosib edi. Bu o'zbek futboli tarixidagi APL tomon ilk o'tish hisoblanadi. Tabiiyki, uni bu yo'lda tayyorlagan barchaga rahmat aytishimiz kerak. Nima ham derdim mamlakatimiz futboli uchun bu katta tashlangan qadam. Omadini bersin deb qolaman.

Timur Kapadze (O'zbekiston MTJ, OTJ sobiq murabbiyi) - Abduqodir Husanov uchun hammamiz xursandmiz va "Manchester Siti" libosida ko'rishni intiqlik bilan kutmoqdamiz. O'zimizning o'zbek yigitining grand jamoaga, top murabbiy qo'liga borayotgani yoqimli. Bunday jamoalar o'z-o'zidan futbolchi olmaydi. Har tomonlama kuzatishadi. Futbolchimizni yuqori baholayotgani ham ko'p narsadan darak berib turibdi. O'ylaymanki, bu o'tish bizning futbolimiz uchun katta plyus. Boz ustiga APLda o'ynaydi. Husanovda kuch, mahorat, yosh hamma narsasi bor. U yana o'sadigan bola. Unga dunyoning eng yaxshi himoyachisi bo'lishini tilayman.

APLdagilar kosmosdan tushmagan yoxud uni "Manchester Siti"da nima kutmoqda? Husanovning sarguzashtlari o'zbekistonlik murabbiylar nigohida