Ushbu mundialda Diego Maradona boshchiligidagi argentinaliklarni boshqargan mashhur murabbiy Karlos Bilardo 82 yoshni qarshi oldi. Uni futbol olamidagilar "Doktor" laqabi bilan chaqirishadi.

Shu munosabat bilan FIFA sayti taniqli murabbiydan qisqacha intervyu oldi. O'z navbatida Karlos Bilardo 1986 yilgi jahon chempionatidagi g'oliblik haqida gapirib berdi:

- "Bu jamoa uchun ortga quruq qo'l bilan qaytishning iloji yo'q. Agar shunday bo'lganida aeroportdan boshlab to uygacha hech kim bizni kechirmasdi. Albatta, bizga ko'pchilik ishonmagandi".

- "Mashg'ulotlar payti golni qanday nishonlashni repeticiya qilganimiz rostmi? Ha, rost. Faqat jahon chempionati startidan keyin kim gol ursa uni qanday nishonlashni mashg'ulotdan so'ng ko'rsatib berardi. Bu narsa futbolchilarga juda yoqqan. Men esa bir gapni aytganman: mayli, goldan so'ng muxlislarga qarab yuguringlar, faqat darvozabon o'z joyida qolsa bo'lgani, chunki u sekin yugurardi."

- "Maradona Angliyaga qo'li bilan gol urganmi yo bosh bilanmi? Bu juda ko'p berilgan savollardan biri. O'yindan keyingi matbuot anjumaniga Maradona ikkalamiz kirganmiz. Jurnalistlardan biri shu savolni berganida Maradonaning jahli chiqib ketgan. "Nimalar deyapsiz? Bu toza gol bo'ldi" deb baqirgan u".

- "Men o'sha jahon chempionatida bir narsadan xafa bo'lganman. Final uchrashuvidan keyin menga oltin medal taqishmagan. Faqat keyinroq kelib qo'limga tutqazishgan", - deya xotirlaydi Karlos Bilardo.

Argentinani jahon chempioni qilgan murabbiy 82 yoshda!