Chempionlik o'yini.

Nihoyat Arsenal chempionlik ritmini ushladi. O'yinda ikki bor hisobda ortda borib, 90+3 daqiqada g'alaba golini urgan londonliklar o'z relslariga ajoyib tarzda qayta olishdi. Bu g'alabaning oldingilaridan qiymatli tomoni shundaki, jamoa yiqilib qayta tura oldi. Yiqilib qayta tura olish esa ruhiy tomonlama katta kuch taqdim qiladi. Arsenalning bugungi o'yini bir necha yil avvalgi Liverpulning chempionlik mavsumidagi harakatlariga o'xshab ketdi. O'zi APLda chempion bo'lishning boshqa yo'li ham yo'q. Mahorat va istedodning o'zi kamlik qiladi. Chempionlikni maqsad qilgan jamoa, ruhiy tomonlama yuqori darajada bo'lishi lozim. Bugungacha “to'pchilar” shu jabhada oqsayotgandi.

Topqir Arteta.

Murabbiylar o'rtasidagi kurashda Unay Emeri Artetaga yutqazdi. Arteta qilgan o'zgarishlarning barchasi ishladi. O'yini chiqmayotgan, adaptaciyada muammoga uchrayotgan Trossar o'rniga tushirilgan Martinelli bir gol urdi va 90+3 daqiqada Jorjinyoni yaxshi vaziyatga olib chiqdi. Tomiyasu, Tirney, Viera umuman barcha murabbiy ishonchini oqladi. Arteta oldingi o'yinlardan farqli Martin Edegorni garchi charchab qolgan bo'lsada zaxiraga olmadi bu ham jamoa foydasiga ishladi.

Muammolar.

O'ng qanot himoyasi bo'yicha savollar ochiqligicha qolmoqda. Uayt va Tomiyasu stabil, ishonchli o'yin ko'rsata olmayapti. Leandro Trossar qanot hujumida o'zini yaxshi his qilmayapti. Aksiga olib Saka hamda Martinellida charchoq alomatlari ko'rinmoqda. Jorjinyo bo'yicha muammolar yo'q (hozircha), italiyalik “to'pchilar” tizimiga tezda qorishib ketdi. Buyog'iga lazaretdagilar safga qaytsa, Mikelning bosho'griqlari ancha kamayadi.

Jaloliddin Xalilov.

"Arsenal" relsga qaytdi