Bir necha yillardan buyon Toshkentning "NBU-Osiyo" jamoasi murabbiylar shtabida ishlab kelgan Tolipov joriy mavsum ish joyini o'zgartirishga qaror qildi. Aniqrog'i bu yil yana birinchi ligada ishtirok etishni boshlagan Haqqulobodning "Norin" jamoasida faoliyat yuritadigan bo'ldi.

- "Norin" jamoasiga bosh murabbiy Ravshan Bozorovning taklifiga binoan kelganman. Bilasiz ilgari "NBU-Osiyo"da Bozorov bilan birga ishlagandik. Shu bois u kishi yangi jamoasida yana men bilan hamkorlik qilishga taklif etdi. Keyin "NBU-Osiyo" bilan xayrlashishga qaror qildim.

- Haqqulobod jamoasiga kelib adashmadim deya olaman. Eng avvalo bu erda xalq futbolni sog'ingan. Uy o'yinlarimizga minglab ishqibozlar tashrif buyurib, stadion tribunasini to'ldirib o'tirishibdi. Albatta bunday muhitda ishlash juda yoqimli bo'lmoqda.

- "Norin" klubi rahbariyati, Davronbek Karimov, Murodjon Sobirov kabi fidoiy insonlar bizni har tomonlama qo'llab-quvvatlamoqda. Yaratilgan sharoitlar ham ko'ngildagidek. Buning uchun ularga minnatdorchilik bildiraman va ishonchini oqlash uchun sidqidildan ishlaymiz.

- Bu erda menga ikkinchi ligada ishtirok etuvchi jamoamizni berishdi. Yosh bolalarga o'z bilimlarimni berib bormoqdaman. Shu bilan birga asosiy jamoada Ravshan Bozorovga ham mashg'ulotlarni o'tkazishda ko'maklashaman - deydi Arslon Tolipov.

Arslon Tolipov: "Norin"ga Bozorovning taklifiga binoan kelganman"