Футболчи ҳозирда мамлакатдаги вазият, клуб ҳақидаги дастлабки таассуротлари, нима учун ўзбек клублари таклифини рад этгани ҳақида фикр билдирди.

“Индонезияда футбол ва бошқа спорт турлари, мусобақалари 15 мартдан сўнг тўхтатилди. Жамоамиз билан карантиндамиз. Машғулот, йиғинлар ташкил қилиш мумкин эмас. Бу ерда беш минга яқин одам коронавирус билан касалланган. Вазият ижобий томонга ўзгаришини кутишдан бошқа чорамиз йўқ.

Чемпионатда умумий учта турни ўтказдик. Биттада ютуқ, мағлубият ва дуранг қайд этдик. Турнир жадвалида 18та жамоа ичида 10 ўринни эгаллаб турибмиз.

Жамоа бош мураббийи мен учун бегона эмас - Игорь Криушенко. Ўзбекистонда “Шўртан” жамоасида фаолият юритганини яхши биласиз. Ғузорда ёмон ишламаганди. Умуман олганда яхши мураббий ва самимий инсон. Жамоадаги барча билан илиқ машғулотлар ва ўйин вақтида самимий муносабатда бўлади.

Таиланд футболи Индонезияникидан кучли. Бу ерда инсонлар футболни жуда яхши кўришади. Уй учрашувларимизда стадион деярли тўлади. Қизиқиш ва эътибор юқор даражада. Учрашувлар пайтида ҳақиқий футбол муҳитини сезасиз.

Менга жамоада беларуслик мураббийнинг ишлаётгани мақул келди. Ўзаро тушунишимизда муаммо йўқ. Рус тилида мулоқот қиламиз.

Суперлигадаги битта жамоадан аниқ таклиф бор эди. Агар хориждан клуб топа олмасам силарга ўтаман деб келишгандик. Якунда четдан чорлов бўлди ва кетишга қарор қилдим. Мени тўғри тушунишди”,- дейди Филипосян.

Абдулазиз Искандаров ёзиб олди.

Артём Филипосян Индонезиядаги янги жамоаси ва “Шўртан” собиқ мураббийи ҳақида гапирди