Asror Aliqulov: "Bugun yaxshi o'yin ko'rsata olmadik. To'p nazorati ko'pincha raqib tomonda bo'ldi. Agressivlik etishmadi. Tez o'ynash bo'yicha ko'rsatma bergandik, ammo yigitlar buni uddalay olishmadi.

- Durang adolatli natijami?

- Shunday. Biroq har qanday xato qimmatga tushishi mumkin edi. Shu sababli bahs oxirigacha bosimda bo'ldik.

- Jasur Xolto'raev asosiy tarkibda maydonga tushmadi. Bu taktik yurishmi yoki unda jarohat bormi?

- Ha, unda kichik shikastlanish bor edi. Taktikada ham o'zgarish bo'ldi. Qanotlardan uzatmalarni ko'paytirdik, ammo o'ylaganimizdek hujumlarni tashkil eta olmadik.

- Sodiqovning o'yinidan qoniqdingizmi?

- Yo'q, qoniqmadim. Navbatdagi bahslarda o'zini ko'rsatadi deb umid qilaman.

- "Qizilqum" uchta o'yindan beri birinchi bo'limda maydonda sayr qilayotgandek tuyilmoqda.

- Jamoamizda yoshi katta futbolchilar ko'p, ularga tushintirishga harakat qilyapmiz. Bu ko'proq futbolchilarning o'ziga bog'liq. Ular o'z familiyasi uchun harakat qilishi lozim.

- O'yinlarni bu vaqtga qo'yish to'g'rimi? Bazi murabbiylar bahslar 19:00dan keyin bo'lsa yaxshi edi deb aytishmoqda.

- Bu haqida ko'p gapirmoqchi emasman. Ro'za tutib, futbol o'ynash qiyin. Vaqtni PFL belgilaydi. Hamma shunday o'ynayapti. Futbolchilar o'z vazifasini professionallardek ado etishni xohlar edim.

- O'rinbosarlar tarkibida ham yaxshi futbolchilar bormi? Ularga imkoniyat beryapsizmi? Masalan, Diyor Rahmatullaev.

- Diyorning o'yinidan mamnunmiz. U "Paxtakor"ga qarshi bahsda maydonga tushdi. Biroq hali yoshligini hisobga olib, tajribaliroq futbolchiga imkoniyat berdik.

Asror Aliqulov: "Ro'za tutib, futbol o'ynash qiyin. Vaqtni PFL belgilaydi"