O'yin haqida

- Ushbu bahsga jiddiy tayyorgarlik ko'rgandik, sababi mehmondagi o'yinlarda ochko ololmay kelayotgandik. O'yinimiz dastavval 26 mayda bo'lib o'tishi kerak edi, ammo 1 iyunga ko'chirildi va bu bizga yanada yaxshiroq tayyorgarlik ko'rishga imkoniyat yaratdi. O'yinga keladigan bo'lsak, boshqacha taktik sxemada o'yinga chiqqanimiz sabab, birinchi taymdagi rejalarimiz amalga oshmadi. Bu sxema ilk bor "Olimpik"ga qarshi qo'llandi, ammo muvaffaqiyatsiz kechmadi, shunday bo'lsa ham vaziyatlar bo'lmadi deb ayta olmayman, bosh bilan berilgan zarba darvoza ustuniga tegib qaytdi. So'ngra ikkinchi bo'limda o'zgarishlar qildik va eski sxemaga qaytdik. Shundan so'ng o'yinchilarimiz o'zlarini yaxshi his qilishdi va taym boshida gollar urdik. Yigitlarga rahmat aytaman, bu g'alaba muhim edi. Shu g'alaba orqali turnir jadvalidagi o'rnimizni yaxshilab oldik. Uyda bo'lib o'tadigan "Lokomotiv" va "FarDU" jamoalariga qarshi o'yinlarga ham yaxshi tayyorgarlik ko'ramiz. "Lokomotiv" va Mirko Elichichni yaxshi bilamiz, ular ajoyib futbol namoyish etishmoqda. Ularga keyingi o'yinlarda omad tilab qolaman.

- Ushbu o'yinda "Jayxun" o'yinchilarga katta ishtiyoq bilan maydonga tushganlari bilindi. Hatto Nukusdagi o'yinda ham bunchalik ishtiyoqni ko'rmagandik. Buning sababi nimada?

- Yuqorida aytganimdek, mehmonda g'alaba qozonishimiz kerak edi. Bunga qadar ham safarda yaxshi o'yinlar ko'rsatganmiz, buni boshqa murabbiylar ham etirof etmoqda, ammo natija masalasida omadimiz kelmayotgandi. Yigitlarga jadvaldagi holatimiz yaxshi emasligini tushuntirdim va yutmasak orqada qolib ketishimizni aytdim. Yigitlarga motivaciya beryapman, bu ushbu jamoaning Pro ligadagi ilk ishtiroki. Maqsadimiz avvalo O'zbekiston terma jamoasiga o'yinchilarni etkazib berishdir, keyinchalik esa "Aral", Superliga klublar va yoshlar terma jamoalariga. Ular uchun Toshkentdagi har bir bahs o'ziga xos motivaciya bo'lmoqda. Ularga ushbu o'yinlarda mutaxassislar kuzatib borishlari orqali Superliga klublarining etiborlarini tortishlari mumkinligi va O'zbekiston yoshlar terma jamoasiga jalb qilinishlari mumkinligini aytaman.

- Bugungi o'yin uchun qaydnomada Nurbek Sarsenbaev o'rin olmadi. O'yindan oldin O'zbekiston o'smirlar terma jamoasi ro'yxati elon qilindi, ammo uni o'sha ro'yxatdan ham topa olmadik. Buning sababi nimada?

- Uning qo'shilganiga ko'p bo'lmadi. Shundan so'ng u jarohat oldi va safimizga qaytganiga uch kungina bo'ldi. Hozirda yakka tartibda shug'ullanmoqda va formasini tiklab olishi kerak. Hozirda pauza kerakligi haqida terma jamoani ham xabardor qildik. U hozirda Nukusda ikki mahal mashg'ulotlar olib bormoqda va o'zini ustida ishlamoqda.

Aybek Nurboev: "Bugungi o'yindagi g'alaba juda muhim edi, aks holda turnir jadvalida orqada qolib ketardik"