Uch tur yakuniga ko'ra barcha raqiblarini yirik hisoblarda enggan Qarshining “Sevinch” jamoasi yuz foizli natija bilan turnir jadvalida peshqadamlik qilyapti. “Metallurg” jamoasi ham yuz foizli natija qayd etgan, biroq bekobodliklar bugun dam olishgani uchun jadvalda ikkinchi o'rindan joy olib turibdi.

Muxlislar uchun bugungi qiziqarli o'yinlardan biri “Paxtakor” va AGMK o'rtasida kechishi kutilgandi. Sababi, har ikkalasi ham “Sevinch” va “Metallurg”dan mag'lubiyatga uchragandi, o'zaro o'yinda kimning nimalarga qodirligini aniqlash mumkin edi. Biroq “Paxtakor” raqibiga nisbatan kuchliroq ekanligi uchrashuv davomida ham, hisobda ham o'z aksini topdi. Rustam Oripov, No'mon Nurmatov kabi yaqin o'tmishning usta futbolchilari ustozlik qilayotgan “Paxtakor” olmaliqlik raqibalariga hech qanday imkonyait qoldirmadi.

AGMK uchala o'yinda ham darvozasidan o'ndan ziyod to'plar o'tkazib yubordi. Maydonda hali tajriba orttirib ulgurmagan, 15-16 yoshli qizlarning to'p tepishlarini kuzatgan muxlis AGMKni “qoloqlikda” ayblashi dargumon. Ammo jamoa AGMKning o'rinbosarlar guruhi ekanligi, asosiy tarkib futbolchilari Ilhom Xanjariev bosh murabbiyligida katta mavsumga jiddiy tayyorgarlik ko'rayotganini inobatga olsak, futzalchi qizlarning har qanday natijalarini olqishlar bilan kuzatishiga shubha qolmaydi.

Turning asosiy o'yini ertaga bo'lib o'tadi. Chempionlikka bosh davogar ikki klub – “Sevinch” va “Metallurg” o'zaro kuch sinashishadi. O'yin “Yoshlik” sport majmuasida soat 10.30da boshlanadi.

17 fevral
“Lokomotiv” – “Sevinch” – 1:6
“Paxtakor” – AGMK – 11:2
3-turdan keyingi vaziyat:

#	Jamoa	O'	YU	D	M	T-N	O
1	Sevinch	3	3	0	0	38-4	9
2	Metallurg	2	2	0	0	24-1	6
3	Paxtakor	2	1	0	1	13-12	3
4	Lokomotiv	2	0	0	2	2-12	0
5	AGMK	3	0	0	3	3-51	0

Ayollar futzali: AGMK 3ta o'yinda 51ta gol o'tkazdi