"O'yin kurashlarga boy o'tdi. Tan olish kerak "Neftchi"ning tarkibi bizdan kuchli. Marko Obradovich legioner qanday bo'lishi kerakligini ko'rsata oldi va gol urdi. Albatta qaysidir joyda xatolarimiz pand berdi, diqqat etishmadi. Raqibni haqli g'alaba bilan tabriklayman. Bugun darvozabonimiz debyutini o'tkazdi. Balki omadli chiqmagan bo'lishi mumkindir, lekin unga ishonamiz. Maydonga tushgan boshqa yoshlarga ham imkoniyat beryapmiz. Tarkibda rotatciyalarni amalga oshirmoqdamiz. Yoshlarning kelajagi bor",- deydi Azamat Abduraimov.

- Jamoangizda yaxshi legionerlar bo'lsada gol ura olishmadi. Buni nima bilan izohlaysiz?

- Bu haqida gapirish qiyin. Chunki legionerlarni men taklif qilmaganman. Ulardan ikkitasi o'ynamoqda. Xorijlik futbolchi mahalliy o'yinchidan bir bosh ustun bo'lishi kerak. Obradovich bu borada o'zini oqlamoqda, deya olaman. Davralar oralig'ida tarkibda o'zgarishlar bo'ladi. Talabga javob bermaydigan legionerlar bilan xayrlashamiz.

- Ijtimoiy tarmoqlarda bitta o'yinda maydonga tushmagan futbolchilar Xurshid Asqaraliev, Bunyod Abdumannonovlarni totalizatorga bog'liqlik joyi bo'lgani uchun tark etdi, degan turli xabarlar chiqdi. Lekin "Neftchi" bilan o'yinda ko'rdikki, ular tarkibda bor. Mazkur holatga munosabatingizni bildira olasizmi?

- Men bu borada championat.asia sayti jurnalisti bilan gaplashdim, aniqlik kiritdim. Gohida jurnalistlar yo'q narsadan sensaciya yasashmoqda. "Xorazm" bilan o'yindan oldin etika qo'mitasini qarori chiqdi, "Yangier"ning 4 nafar futbolchisi jarimaga tortildi. Jarima to'lanmagunicha ular maydonga tusha olmaydi. Abdumannonov va Asqaraliev "Xorazm" bilan o'yinda qaydnomaga kiritilmagandi. Jurnalist esa ularni totalizatorda qatnashgan, degan fikr yuritgan. Bu noto'g'ri. Qaydnomaga kiritilmagan boshqa futbolchilar esa bunga qadar yaxshi o'ynay olishmagandi. Ko'rdingiz, Abdumannonov asosiy tarkibda, Asqaraliev zaxiradan maydonga tushdi. Etika qo'mitasi diskvalifkaciya qilgan futbolchilar boshqalar.

Azamat Abduraimov: "Talabga javob bermaydigan legionerlar bilan xayrlashamiz"