Ilk bahsda vakillarimiz 0:4 hisobida mag'lub bo'lishdi. Ikkinchi uchrashuvda esa O'zbekiston 2:1 hisobida g'alaba qozondi. Ushbu o'yinlar haqida Azamat Abduraimov o'z fikrlarini bildirdi.

"Tojikiston o'smirlari yaxshi jamoa. O'tgan yilga taqqoslaganda ko'plab yoshi katta futbolchilarni qo'shib olishgan ekan. Ularning yoshi katta ekanligi ko'rinib turibdi. Ammo ikkinchi o'yinda ikkinchi taymda 10 futbolchi bo'lib o'ynaganimizga qaramay biz ularni mag'lub eta oldik. Baribir bizning yigitlar kuchliroq.

Birinchi o'yindagi mag'lubiyatning sababi: Biz yig'in o'tkazayotgandik, futbolchilarga yuklamalar berilgandi, oyoqlari o'zlariga bo'ysunmadi. Bu yil hisobidagi ilk xalqaro o'yinimiz edi. Bizga tajriba to'plash uchun ko'proq o'yinlar zarur. Ammo oldingi rahbariyat bironta turnir, bironta o'yin tashkil etib bermadi. Faqat chiroyli gaplar bo'lgandi xolos.

Yana bir sabab: Bu yig'inga besh nafar asosiy futbolchini olib ketmadik. Ularning o'rniga olib ketilgan futbolchilarni sinab ko'rishni istadik, ammo hali tayyor emasliklari ko'rinib qlodi. Bularning barchasi hozir o'rtoqlik o'yinlarida ko'ringani yaxshi.

Agar biz ham har oyda yig'inlar va xalqaro o'yinlar o'tkazganimizda, terma jamoaning asosini aniqlab olgan bo'lardik. Bizning muammomiz: O'z yog'imizda qovurilib yotibmiz. Toshkent shahar chempionatida "Paxtakor" barchani mag'lub etmoqda, kurash bitta-ikkita o'yinda bo'ladi. Ular bunda shiddatga tayyor emaslar.

Shu bois imkon qadar ko'proq o'yin o'tkazish kerak va mag'lub bo'lishdan qo'rqmaslik kerak. Salbiy natija xotirjamlikdan ko'ra ko'proq foyda keltiradi.

Keyingi o'yinda asosiy tarkibni tushirdik va ular xarakter ko'rsatdik. Mag'lub bo'layotgandik va hisobni tenglashtirdik. Kamchilikda g'alaba qozonib ketdik. Butun ikkinchi taymda kurashdik. Kiyim almashtirish xonasida qanday xursandchilik bo'lganini tasavvur qila olmaysiz! Kollektiv mana shunday tuziladi.

Ravshan Ermatov va yangi rahbariyat ish kunining ilk kunida bizning murabbiylar shtabimizni qabul qilishdi, muammolarimizni hal qilishdi. Saralash bosqichiga qadar rejalarni tuzib oldik. Ularga rahmat aytaman. Futbol kishilari bilan gaplashish oson va oddiy. Ular futbolni ichidan bilishadi va bizga endi haqiqatdan ham bizga etibor qaratishganini his qildim", - deydi Azamat Abduraimov.

Azamat Abduraimov: "Tojikiston o'smirlar terma jamoasi safida yoshi katta futbolchilar ko'pligi bilinib turibdi"