Biz "Yunusobod" sport majmuasida termamiz mashg'ulotlarini kuzatib bordik va mashg'ulotdan keyin bosh murabbiy Bahodir Ahmedovning fikrlari bilan qiziqdik.

- Kechadan boshlab O'zbekiston milliy terma jamoasi navbatdagi yig'inini boshladi. Yig'in to'g'risida nimalar deya olasiz?

- To'g'ri, jamoaning asosi qolgan. Ammo baribir ko'proq yoshlarimizga etibor beryapmiz. Jamoamizda yo'qotishlar bor Ulardan biri – Davron Choriev. Unga ozgina dam berdik. Avgustning oxirigacha tiklanish uchun dam berdik. Shundan so'ng jamoaga qo'shiladi. Qolgan yigitlarimiz soppa-sog'. Kichik jarohatda bo'lib turganlarga shifokorlarimiz yaxshi qarashyapti. Bundan ko'nglimiz to'q.

- O'zbekiston futzal terma jamoasi ko'p bora Osiyo chempionatlarida 2-o'rinni olib kelgan. Bu yil esa Jahon chempionatidagi o'yinlardan keyin chempionlik vazifasi qo'yilgandir. O'tgan safar JCHdan avval ispaniyalik murabbiylar kelib yordam berishgandi. Osiyo chempionatiga ketishdan avval bu tajriba yana qo'llaniladimi?

- Bu borada muzokaralar ketmoqda. Jismoniy tayyorgarlik ustida ispaniyalik murabbiy (Arkaitz Sisniega – tahr.) bilan birga ishlamoqchimiz. Nasib qilsa, kelasi yig'inlarimizga chaqiramiz. O'zi rozi, oxirigacha kelisha olsak, kelgusi yig'inlarimizdan ispaniyalik murabbiy bilan ishlaymiz.

- Osiyo chempionati mezboni Kuvayt haqida nima deya olasiz? Kuvayt bilan 2 ta o'yin o'tkaziladi. Ular ikki marta 4-o'rinni olishgan.

- Kuvayt hozir anchagina yaxshi holatda. Murabbiyi braziliyalik, uni yaxshi taniyman. Jamoani yaxshi shakllantirgan. O'ylaymanki, Kuvayt bilan bahs oson bo'lmasa kerak. Osiyo chempionatiga barcha terma jamoalar yaxshi tayyorgarlik ko'rishyapti. Osiyoda futzal juda rivojlanib ketdi. Shuning uchun ham oson bo'lmasa kerak.

- Kuvaytdan qaytgach, biroz muddatdan so'ng yana mashg'ulotlar boshlanadimi?

- Ha, shunday. Kuvaytdagi yig'indan so'ng milliy chempionatimizning 1-turi bor. Shundan so'ng ikki kun yigitlarga dam berib, mashg'ulotni boshlaymiz.

- Agarda chempionatning 1-turida "Jizzax-Kenteks" va BMB jamoalari to'qnash kelib qolsa, shu o'yinni boshqa muddatga qoldirish mumkinmi? Jarohatlar bo'lib qolishi mumkin...

- Buni men hal qilmayman. Buni PFL yoki O'FA hal qiladi. Bu futbol va unda hamma narsa bo'lishi mumkin.

Mazkur yig'in 21 avgustga qadar davom etadi. Uning ikkinchi qismi esa bevosita Kuvaytda davom ettiriladi. Bahodir Ahmedov shogirdlari mazkur yig'in doirasida kuvaytlik futzalchilarga qarshi o'rtoqlik o'yinlarida ishtirok etishlari rejalashtirilgan.

18 avgust

Kuvayt - O'zbekiston

20 avgust

Kuvayt - O'zbekiston

O'zbekiston futzal terma jamoasi tarkibi: Rustam Umarov ("Jizzax-Kenteks"), Abbos Elmuradov (BMB), Ravshan Eliboev (BMB), Ixtiyor Ropiev ("Jizzax-Kenteks"), Mashrab Odilov (BMB), Anasxon Rahmatov ("Jizzax-Kenteks"), Shahram Faxriddinov ("Dinamo"), Ilhom Hamroev ("Jizzax-Kenteks"), Husniddin Nishonov (BMB), Dilshod Rahmatov ("Jizzax-Kenteks"), Daler Eshonqulov ("Dinamo"), Davlat Ibragimov (AGMK), Akbar Usmonov (BMB), Aslbek Isroilov ("Bunyodkor"), Elbek To'lqinov ("Jizzax-Kenteks"), Sunnat Jo'raev ("Jizzax-Kenteks")

Bahodir Ahmedov: "Jismoniy tayyorgarlik ustida ispaniyalik murabbiy bilan birga ishlamoqchimiz"