- Dastlab o'yin haqida fikringiz?

- Gapirish juda qiyin bo'lyapti. Alamli mag'lubiyatlar ko'payib ketdi. Hammasi achinarli bo'lyapti. Nimanidir o'zgartirmasak bo'lmaydi. Biz bunday mag'lubiyatlarga loyiq emasmiz. Bugungi o'yinga kelsak, O'zbekistonning eng kuchli jamoalaridan biriga qarshi bahs olib bordik. Raqibga astoydil qarshilik ko'rsata oldik. Faqat bazi holatlarda ustunlik ularda ko'proq bo'lgandir, lekin biz ham bo'sh kelmadik. Afsuski, yana yutqazdik. Kiyim almashtirish xonasida aytadigan gapning o'zi qolmadi. Chunki har bir gapimiz bahonaga o'xshab qolyapti. Hayot davom etadi, qachondir bu omadsizlikning ham yakuni bo'lishi kerak. Mag'lubiyatli seriya bir kun kelib tugaydi degan umiddaman.

- Bu savolni "Neftchi" ustoziga ham berdik. Bir paytlar "Neftchi" qiynalib qolganida qo'qonlik futbolchilar borib yordam qilgandi. Endi "Neftchi" ham yordam bergani maqul emasmi? Har holda biz bitta viloyat jamoasimiz. O'zaro hamkorlik bo'lgani yaxshi-da. Siz bunga nima deysiz?

- Endi o'yinchi oldi-berdisi bo'yicha hamkorliq qilsa bo'ladi. Lekin sport tamoyiliga bo'yicha olib qarasak, maydonga chiqqandan keyin ular ham, biz ham bir-birimizga qarshilik ko'rsatib futbol o'ynashimiz kerak. Chunki busiz raqobat bo'lmaydi. Futbolchilar bo'yicha o'zaro hamkorlik bo'lgani yaxshi, nafaqat "Neftchi" bilan, balki hamma jamoalar bilan.

- Yozgi tanaffusda yangi futbolchilar olindi. Abdug'afur Haydarov haqida fikringiz qanday?

- Abdug'afur yaxshi futbolchi. U "Surxon"da asosiy tarkib o'yinchisi edi. Yoshlar terma jamoasida ham o'ynadi. "Yulduzlik kasali"ga chalindi chog'i zaxiraga o'tirib qoldi. Terma jamoadagi o'rnini esa Ali Abdurahmonovga berib qo'ydi va shu jihatdan raqobatda yutqazib qo'ydi. Lekin u yosh bo'lishiga qaramay mahoratli o'yinchi, endi 20 yoshda. Vaqt o'tib yanada kuchli bo'lib borishiga ishonamiz. Unga biroz vaqt kerak. Eng asosiysi Abdug'afur futbol o'ynashdan qo'rqmaydi. Hali oldinda 13ta tur bor va albatta uning yordami tegadi.

- "Neftchi" bosh murabbiyi maydon holati yaxshi emasligini gapirdi.

- Albatta, hammaning yaxshi maydonda to'p tepgisi do'ladi. Hozir yurtimizda chiroyli maydonlar ko'payib qoldi. Afsuski, bizning maydon holatini zo'r deb bo'lmaydi. Men maydon bo'yicha mutaxassis emasman. Klubimiz rahbariyati va boshqalar maydonni ideal holatga keltirish uchun harakat qilishyapti.

Bahrom Haydarov: "Har bir gapimiz bahonaga o'xshab qolyapti"