O'yin haqida

- Bugungi o'yinda issiq ob-havo sharoiti har ikki jamoaga ham qiyinchilik tug'dirdi. Uchrashuvning bir oz ertaroq vaqtga qo'yilgani tufayli dastlab o'yinga kirishib ketishda muammolar ko'zga tashlandi. "Qizilqum" ikkinchi tarkib bilan maydonga tushdi, biroq bizning futbolchilar g'alabaga o'yindan oldin ishonib qo'yishgan ekan. Bu haqida gaplashib olamiz. Lekin yakunda g'alabaga erishdik. Bugun o'yin amaliyoti kam futbolchilarga ham imkoniyat berishga harakat qildik. Kubok o'yinida ko'p guvoh bo'ldik, bunday uchrashuvlarda har qanday natija qayd etilishi mumkin. Biz shu faktorni engib o'ta olganimizdan xursandman. Navbatdagi bosqich yo'llanmasi bilan jamoamiz azolari va muxlislarimizni tabriklayman.

- Bugun ko'proq zaxirada qolib ketayotgan futbolchilarga etibor qaratdingiz. Ular ko'rsatgan o'yindan qanchalik qoniqdingiz?

- O'yinni takroran ham ko'rib chiqamiz. Birdaniga xulosa berib bo'lmaydi. O'yin emociyalarida kimningdir faqat xatolari ko'rinishi ham mumkin. Xayrullaev, Muxtorov, Jo'raev, Mirodilov kabi futbolchilarga imkoniyat berdik. Umumiy xulosa, biron futbolchi bugun o'zida yomon taasurot qoldirgani yo'q.

- Yoshlar jamoasida 2-raqamli futbolchi o'zini yaxshi ko'rsatib kelayapti. Bu yigitni asosiy tarkibda ham sinab ko'rilsa bo'ladimi?

- Men har doim takidlayman, futbolchi o'zining loyiqligini faolligi va maydondagi harakatlari bilan isbotlaydi. Hech kim uchun asosiy tarkib eshiklari yopiq emas. Ro'yxatdan o'tkazilgan futbolchilarga har doim imkon berishga harakat qilamiz. Mirodilov yoki Abdurahimov bo'ladimi, biz bir xil imkoniyat berishga imkoniyat berishga harakat qilamiz.

- Asliddin Toshtemirov qancha muddatga safdan chiqqan?

- Dastlabki xulosamizda u birinchi davra oxiriga qadar bizga yordam bera olmasligi malum bo'lgandi. Biroq, kutilganidan ham ertaroq qaytadigan ko'rinadi. Ertaga tibbiy tekshiruvdan o'tadi, biroq birdaniga uni maydonga tushirib, jarohati qaytalanishini istamaymiz. Jismoniy imkoniyatini to'liq tiklab olishi kerak.

- Superligada ketma-ket 2 ta o'yinda jamoa mag'lub bo'ldi. Oldindagi o'yinga boshqacharoq yondashuv bilan tayyorgarlik ko'rayapsizlarmi?

- Tayyorgarlik doimgidek. Taktik yoki sxemalarda o'zgarish bo'lishi mumkin, biroq biz har bir o'yinga jiddiy tayyorlanamiz. Raqibni o'rganib chiqamiz, kuchli va kuchsiz tomonlarini baholaymiz. O'zgarishlar bo'lishi mumkin. Har bir jamoaga hurmat bilan qaraymiz.

Bahrom Haydarov: "Har bir jamoaga hurmat bilan qaraymiz"