"O'tgan safargi mag'lubiyatdan so'ng rahbariyat va muxlislar oldida o'zimizni oqlashimiz kerak edi. Futbolchilar ham shunga yarasha kurashishdi. "Bunyodkor" O'zbekistonning kuchli jamoalaridan biri. Biz ularga qarshi munosib qarshilik ko'rsatdik deb o'ylayman. Qarshi hujumlarda raqibni ushlashni reja qilgandik. Bizda ham etarlicha vaziyatlar bo'ldi, ammo ulardan foydalana olmadik. Birinchi davra yakunlanayotganiga qaramay, yigitlar 120 daqiqa davomida to'xtamay yugurishmoqda. Penaltilarni yaxshiroq ijro etsak ham bo'lar edi, lekin bu haqda bir nima deyish qiyin. Bugungi uchrashuv natijaga mos bo'ldi" - deya fikr bildirdi Bahrom Haydarov bugungi uchrashuv haqida.

- Penaltilar seriyasidan oldin darvozabon Aziz Isoqovni maydonga tushirish mumkinmidi? U o'tgan mavsumda "Metallurg"ga qarshi o'yinda uchta zarbani bartaraf etgan edi.

- 90 daqiqada ham shu haqda o'ylagandim. Ekstra taymlar davomida futbolchini almashtirish mumkin emas, faqatgina tanaffusda Isoqovni maydonga tushirishimiz mumkin edi. Isoqovni maydonga tushirsak, boshqa futbolchini zaxiraga olish imkoniyatidan mahrum bo'lardik. Bir futbolchimiz charchab qoldi va kichik jarohati bor edi. Reja bo'yicha Aziz maydonga tushishi kerak edi, u chigil yozdi mashg'ulotlarini boshlab yuborgan edi.

- Andro Giorgadze haqida gapirib o'tsangiz.

- Andro Giorgadze, Asliddin Toshtemirov va Jasur Yoqubov jarohatda. Uchta markaziy himoyachimiz jarohatlangan. "Mashal"ga qarshi o'yinda ham shunday holat edi. Hozir bor-yo'g'i bitta dona markaziy himoyachimiz Alisher Salimov bor. Boshqa futbolchilarning ular jarohatlangan himoyachilarning o'rnini to'ldirishga harakat qilmoqda.

- Ikki nafar futbolchi penaltilardan unumli foydalana olmadi. Ular mashg'ulotlarda 11 metrlik zarbalarni ijro etisharmidi?

- Ha. Har mashg'ulotda penalti tepishar edi. Bunday vaziyatda juda katta ruhiy bosim bo'ladi. Zo'r ijrochi ham eng so'nggi vaziyatda qarorini o'zgartirib yuborishi mumkin. Futbolchilar o'ziga kerakli xulosalar chiqarib olishadi degan umiddaman. Murabbiy sifatida ularni ayblay olmayman.

Bahrom Haydarov: "Murabbiy sifatida ularni ayblay olmayman"