"Ўтган сафарги мағлубиятдан сўнг раҳбарият ва мухлислар олдида ўзимизни оқлашимиз керак эди. Футболчилар ҳам шунга яраша курашишди. "Бунёдкор" Ўзбекистоннинг кучли жамоаларидан бири. Биз уларга қарши муносиб қаршилик кўрсатдик деб ўйлайман. Қарши ҳужумларда рақибни ушлашни режа қилгандик. Бизда ҳам етарлича вазиятлар бўлди, аммо улардан фойдалана олмадик. Биринчи давра якунланаётганига қарамай, йигитлар 120 дақиқа давомида тўхтамай югуришмоқда. Пенальтиларни яхшироқ ижро этсак ҳам бўлар эди, лекин бу ҳақда бир нима дейиш қийин. Бугунги учрашув натижага мос бўлди" - дея фикр билдирди Баҳром Ҳайдаров бугунги учрашув ҳақида.

- Пенальтилар сериясидан олдин дарвозабон Азиз Исоқовни майдонга тушириш мумкинмиди? У ўтган мавсумда "Металлург"га қарши ўйинда учта зарбани бартараф этган эди.

- 90 дақиқада ҳам шу ҳақда ўйлагандим. Экстра таймлар давомида футболчини алмаштириш мумкин эмас, фақатгина танаффусда Исоқовни майдонга туширишимиз мумкин эди. Исоқовни майдонга туширсак, бошқа футболчини захирага олиш имкониятидан маҳрум бўлардик. Бир футболчимиз чарчаб қолди ва кичик жароҳати бор эди. Режа бўйича Азиз майдонга тушиши керак эди, у чигил ёзди машғулотларини бошлаб юборган эди.

- Андро Гиоргадзе ҳақида гапириб ўтсангиз.

- Андро Гиоргадзе, Аслиддин Тоштемиров ва Жасур Ёқубов жароҳатда. Учта марказий ҳимоячимиз жароҳатланган. "Машъал"га қарши ўйинда ҳам шундай ҳолат эди. Ҳозир бор-йўғи битта дона марказий ҳимоячимиз Алишер Салимов бор. Бошқа футболчиларнинг улар жароҳатланган ҳимоячиларнинг ўрнини тўлдиришга ҳаракат қилмоқда.

- Икки нафар футболчи пенальтилардан унумли фойдалана олмади. Улар машғулотларда 11 метрлик зарбаларни ижро этишармиди?

- Ҳа. Ҳар машғулотда пенальти тепишар эди. Бундай вазиятда жуда катта руҳий босим бўлади. Зўр ижрочи ҳам энг сўнгги вазиятда қарорини ўзгартириб юбориши мумкин. Футболчилар ўзига керакли хулосалар чиқариб олишади деган умиддаман. Мураббий сифатида уларни айблай олмайман.

Баҳром Ҳайдаров: "Мураббий сифатида уларни айблай олмайман"