- O'yin haqida

"Neftchi" jamoasini g'alaba bilan tabriklayman. Jamoani qabul qilib olganimga 10 kun bo'ldi. Bu muddat ichida baribir o'zgartirish kiritish qiyin. Yigitlar bor kuchlari bilan harakat qilishayapti. Oldingi o'yin bilan bugungi o'yinda farq sezildi. Futbolchilar bilan amaliy va nazariy mashg'ulotlarni olib bordik. O'tgan gal ham aytdim, tarkib mavsumga kech yig'ilgan. Bugun yigitlar yomon o'ynagani yo'q. Tajribali Mansur Saidov ham o'yin davomida o'z iqtidorini namoyish etdi. "Neftchi"ning ko'rsatgan o'yini haqida jamoa bosh murabbiyi o'z xulosasini chiqaradi. Bizning jamoa kuchayib borishi uchun vaqt kerak. Ayni damda "Hokim kubogi"da o'ynagan futbolchilardan ayrimlari boshqa jamoalarga o'tib ketishgan. Yigitlar bugun o'yindan oldin berilgan ko'rsatmalarni bajarishdi. Fikrimcha bugungi o'yindagi birinchi golda o'yindan tashqari xolat bor edi. Gol kiritgan emas, raqibning hujumda oldinga o'tgan yana bir futbolchisida shunday holat ko'rindi. Buni ko'rib chiqyapmiz, balki tegishli tartibda birinchi gol yuzasidan etiroz bilan chiqarmiz. 80-minutda Pavel Smolyachenkoga nisbatan qo'pollik ishlatildi. Shaxsiy fikrim, bu vaziyatda penalti belgilanishi kerak edi.

- Mo'ydin Mamazulunov va Xushnud Bozorovlar kech o'yinga qo'shilganining sababi nima?

- Hujumchilarni maydonga tushirishdan oldin himoyani ham o'ylash kerak. Gol o'tkazib yuborilgan vaziyatlarda qanot himoyachimizga nisbatan etirozim bor. Barchaga imkoniyat berib ko'rib olamiz. Shundan kelib chiqib ularning nimaga qodir ekanliklari bo'yicha xulosa qilsak bo'ladi. Futbolchilarni mashg'ulotda o'yindagi kabi ko'rish qiyin.

- "Neftchi" haqli g'alabaga erishdi deb hisoblaysizmi?

- "Neftchi" tarkibi ancha avval yig'ilgan. Bizda yana takrorlayman, "Hokim kubogi"da o'ynagan ko'p futbolchilar ketib qolishgan. Hozir jamoamizda o'rtada o'ynaydigan futbolchiga bo'lgan ehtiyojimiz bor. Javohir Rasulovni majburan himoyaga qo'yyapmiz, u ham aslida markaziy himoyachi emas.

- O'tgan yili tarkibda o'ynagan Ahror O'ktamov ham navbatdagi o'yinlarda maydonga tushishi mumkinmi?

- Albatta barcha futbolchilarga imkoniyat beramiz. O'ktamov hozircha mening o'yin uslubimda o'z o'rnini topib olishi kerak. Javohir Rasulov o'tgan mavsumdagi jarohati sabab to'liq formada emas. U o'yinlar davomida kuchayib boradi.

- "Istiqlol" bosh murabbiyi sifatida ikkita o'yin o'tkazdingiz. Ayni damda sizni qaysi chiziqlar xavotirga solyapti?

- Meni hujum chizig'imiz tashvishlantiryapti. Darvoza chizig'imiz yomon emas, bugungi o'yinda ko'plab vaziyatlarda jamoamizni qutqardi.

Bahrom Xakimov: "Raqibning birinchi golida o'yindan tashqari holat bordek ko'rindi"