Тошкент вақти билан 21:15да бошланадиган учрашувда ким ғалаба қозонса, шу жамоа гуруҳ ўйинларига йўл олади. Кеча бўлиб ўтган матбуот анжуманида "Банияс" бош мураббийи Даниэль Исаила қатнашиб, саволларга жавоб қайтарди.

Руминиялик мураббий ўз фикрларини қуйидагича бошлади:

- Бу биз учун муҳим ўйин бўлади. Чунки ОЧЛ гуруҳ босқичига чиқишимиз фақат шу ўйинга боғлиқ. Чемпионлар лигасида иштирок доим илиқ ҳиссиёт беради. "Насаф" билан кечадиган баҳсда ўзимизни кўрсатиш учун бор имкониятни ишга соламиз. Мен ўз пайтида Руминия U-21 терма жамоасини бошқариб яхши натижаларга эришганман. Энди бўлса ОЧЛда ҳам ўзимни кўрсатишни хоҳлайман. Бу менга янги мотивация беради.

- Рақиб ҳақида қандай фикрдасиз?

- "Насаф"ни яхши ўрганишга ҳаракат қилдик. Уларга гол уриш бирмунча қийин деб ўйлайман, чунки жамоанинг ҳимоя чизиғи чакки эмас. Қолаверса рақибни ўрганиш жараёнида тезкор футболчилари борлигига гувоҳ бўлдик.

- Таркибда йўқотишлар борми?

- Бор. Асосий ҳимоячимиз Ҳуссайн Аббос жароҳат олган ва ўйинда иштирок этиши сўроқ остида. У ҳимоячи бўлишига қарамай 12та гол урди. Лекин "Насаф" билан беллашувда бошқалар гол уради деб ўйлайман. Жамоа билан йиғилиб ҳаммасини муҳокама қилдик, йигитлар ўйинга тайёр.

- Сизнингча, "Насаф"нинг кучсиз томони нимада?

- Аввало мени ўз жамоамнинг ҳолати қизиқтиради. Афсуски, ҳозирги пайтда захирамиз кенг эмас. Гуруҳ босқичига чиқсак, қийналиб қолишимиз мумкин. Лекин унгача плей-оффдан ўтишни ҳал қилиш керак. Яна қайтариб айтаман, биз "Насаф"ни ҳурмат қиламиз, яхши жамоа, аммо Чемпионлар лигаси гуруҳ ўйинларига боришни орзу қиляпман.

"Банияс" бош мураббийи ўйиндан олдин нималар деди?