Juda bir g'alati eshitilar, ammo Romeu bugungi "Barselona"ga Serxio Busketsdan ko'ra ko'proq mos tushadi. Jamoaga maydon markazida raqib rejasiyu, hujumlarini buzib tashlaydigan futbolchi etishmayotgandi. Bog'lovchi vazifasini, o'sha Busketsning eng zo'r davridagidek, sifatli bajaradigan, hujumkor yarim himoyachilarning ortida, to'pni olib qo'yishda ular uchur ham ter to'kadigan futbolchi zarur edi.

Frenki de Yongga Kataloniyada aynan shunday sherik etishmayotgandi. Frenki yonida tayanch yarim himoyachi bo'lganida faoliyatining eng yaxshi davrlarini boshidan o'tkazgan. Yoshi ancha o'tib qolgan Buskets bilan u moslashishga, o'zining eng yaxshi hislatlarini qurbon qilishiga to'g'ri kelardi. Romeu bilan uning o'yini qayta ochilishi mumkin bo'ladi.

O'z navbatida Romeudan talab qilinadigan yagona narsa – to'pni olib qo'yib, eng yaqin sherigiga uzatish. Qolgan ishni qiladiganlar etarli: Frenki de Yong, Pedri, Gavi, Gyundogan.

Hozirdan ogohlantirib qo'yaylik Romeu muxlislarni hayratga solmaydi va maydonda yaqqol ajralib turmaydi. Undan mo'jiza kutmang. U tinmay mehnat qiladi va raqibning asabiga tegadi. Romeu o'zi uchun to'langan besh millionning har bir sentini oqlaydi.

"Barselona"ning yangi futbolchisi Oriol Romeu haqida