Hindiston yoshlar terma jamoasiga qarshi 1-tur o'yini oldidan O'zbekiston terma jamoasi bosh murabbiyi Baxtiyor Ashurmatov hamda terma jamoa sardori Vladimir Kozak jurnalistlar savollariga javob berishdi.

O'zbekiston olimpiya terma jamoasi bosh murabbiyi Baxtiyor Ashurmatov terma jamoa saralash bahslariga yaxshi tayyorgarlik ko'rgani va terma jamoa saralashdan muvaffaqiyatli o'tib Osiyo Chempionati final bosqichiga chiqishni maqsad qilganini takidladi.

Osiyo Chempionati saralash bahslariga yaxshi tayyorgarlik ko'rdik deb o'ylayman. Biz Bangladeshga turnir boshlanishidan biroz avvalroq keldik, boisi futbolchilar bu erdagi iqlim sharoitiga moslashishlari kerak edi. O'ylaymanki, moslashishga ulgurdik va saralash o'yinlarini yaxshi o'tkazib final bosqichi yo'llanmasini qo'lga kiritishga harakat qilamiz. Biz guruh bosqichidagi barcha terma raqiblarimizni hurmat qilamiz va ularga qarshi jiddiy tayyorgarlik ko'ramiz, - deydi Ashurmatov.

Saralash bahslarida ishtirok etadigan barcha jamoalarning vazifasi bir - Osiyo Chempionatiga yo'llanmani qo'lga kiritish. Bizni oson o'yinlar kutib turibdi deb o'ylamayman, ammo umid qilamanki, futbolchilar ishonchni oqlaydilar va o'z oldilariga qo'yilgan maqsadga erishadilar, - deya qo'shimcha qildi O'zbekiston olimpiya terma jamoasi bosh murabbiyi.

Saralashning 1-turidagi raqib - Hindiston olimpiya terma jamoasi haqida to'xtalar ekan, Ashurmatov ushbu terma jamoa so'nggi yillarda ancha o'sishga erishganini aytdi.

Hindiston futbolida so'nggi yillarda ancha o'sish yuzaga keldi. Ularda so'nggi yillarda futbolga katta etibor berilmoqda. Qolaversa Hindiston chempionati saviyasi ham ancha o'sdi. Shunday ekan, ushbu terma jamoaga qarshi bizni qiyin o'yin kutib turibdi deb ayta olaman. Umuman guruhimizdagi hech bir o'yin biz uchun ham, raqiblar uchun ham oson bo'lmaydi. Sir emas, Osiyo futboli so'nggi yillarda ancha o'sishga erishdi. Hozirda har bir terma jamoaga qarshi jiddiy tayyorgarlik ko'rish kerak, - dedi Ashurmatov.

O'zbekiston olimpiya terma jamoasi sardori Vladimir Kozak terma jamoa turnirda o'z oldiga katta maqsadlar qo'yganini takidladi.

Biz har qanday sharoitga tayyormiz. Hech bir o'yin oson bo'lmaydi. Ammo, biz bu erga g'alaba uchun keldik. Munosib va kuchli o'yin ko'rsatib Qatarda bo'lib o'tadigan Osiyo Chempionatiga yo'llanmani qo'lga kiritmoqchimiz, - dedi Kozak.

Eslatib o'tamiz, O'zbekiston olimpiya terma jamoasi Osiyo Chempionati saralash bahslarini 27 mart kuni Hindiston olimpiya terma jamoasiga qarshi bahs bilan boshlaydi. Ushbu uchrashuv Toshkent vaqti bilan soat 14:00da boshlanadi. Saralashning 2-tur uchrashuvi 29 mart kuni Bangladesh olimpiyachilariga qarshi bo'lib o'tsa, saralashning so'nggi turida O'zbekiston olimpiya terma jamoasi Suriyaga qarshi bahs olib boradi.

Baxtiyor Ashurmatov: Bizni oson o'yinlar kutib turibdi deb o'ylamayman