- Avvalambor, O'zbekiston xalqini Mustaqilligimizning 30 yillik bayrami bilan tabriklayman. Yurtimiz tinch va farovon bo'lsin. "Surxon" so'ngi uchrashuvlarda yaxshi o'yin namoyish etayotgan edi. Bahrom Haydarov jamoani o'yinlarga yaxshi tayyorlab kelayotgandi. Ular oxirgi uchta o'yinda g'alaba qozonishdi. Bu bizni bir oz xavotirda ushlab turgandi. Yana bir tomoni, bizda bosim bor, yani uydagi o'yinlarda g'alaba qozona olmayotgan edik.

"Qo'qon-1912" avvaldan o'z maydonida kurashuvchan o'yin namoyish etib kelgan. Afsuski, biz joriy mavsumda o'z uyimizda qimmatli ochkolarni boy berdik. Shu sababli bugungi o'yinda ochko yo'qotishga haqqimiz yo'q edi. Yigitlar buni tushungan holda bugun maydonga tushdi. Murod Xolmuhammedov haqiqiy etakchi. Uning maydonda va maydondan tashqarida jamoamizdagi o'rni juda muhim. Bugun g'alabaga osonlikcha erishmadik. Muxlislarimizni, jamoamiz rahbariyatini va barcha jamoamiz azolarini uydagi birinchi g'alabamiz bilan tabriklayman.

- Bugun jamoangiz ikki nafar hujumchi bilan harakat qilgan bo'lsa ham vaziyatlardan foydalanish samadorligi yuqori bo'lmadi. Buni qanday izohlaysiz?

- Biz bugun ko'plab vaziyatlar yaratdik. Masalan 2:0 dan keyin ham Suhrob Berdiev va Asadbek Sobirjonovlarda gol kiritish vaziyatlar bo'ldi. Biz uchinchi va to'rtinchi gollarni kiritganimizda xotirjamroq bo'lardik. Lekin ikkita gol va darvozamiz daxlsizligini saqlab qola olganimiz yomon natija emas deb o'ylayman. Eng asosiysi, vaziyatlarni borligi deb hisoblayman.

- Keyingi o'yinga qadar 15 kun vaqt bor ekan. Bu jamoaning jismoniy imkoniyatlariga tasir qilmaydimi?

- 15 kunlik tanaffus barcha jamoalarga birdek tasir qiladi. Oldinda FIFA kunlari bor. Bu oldindan ko'rib chiqilgan vaziyat. Bu navbatdagi turda "Bunyodkor" bilan kechadigan o'yinga tasir qilmaydi. Biz futbolchilarga bayramoldi to'rt kunlik tanaffus beramiz. Shundan so'ng Toshkent shahrida yig'ilib tayyorgarligimizni davom ettiramiz. "Bunyodkor" bilan o'yinga qadar rejamizda bitta o'rtoqlik uchrashuvi bor.

Oxirgi o'yinlarda bizda jarohatlar ko'payib ketgandi. Murod Xolmuhammedov, Ivan Yosovich, Hamidullo Abduhamidovlar jarohat olishgandi. Ularda jarohat tufayli o'yinlarga tayyorgarlik ko'rish uchun kam fursat bo'layapti. Shuningdek, darvozabonimiz Muzaffar Abdullaev ham jarohat oldi.

- O'yinning 17:00 da boshlanishi qiyinchilik tug'dirmadimi?

- Ochig'i, o'yinning 17:00 da boshlanganidan ko'ra muxlislarimiz stadionda bo'lmagani meni tashvishga soldi. O'ylaymanki, tez kunlarda muxlislar stadionga qaytariladi, bunga umid qilamiz. Hozir ob-havo salqinlab qoldi, keyingi tur sentyabrda o'tadi. O'yinlarning vaqtliroq boshlangani muxlislar uchun ham qulay. Chunki sentyabr oyida 20:00 dagi vaqt ancha sovuq bo'ladi. Har ikki jamoa bir xil sharoitda o'ynadi. O'yinimiz chiqmasa yoki yutqazsak issiq sabab yoki o'yin vaqtini noto'g'ri ekani tufayli yutqazdik deb bahona qilmasligimiz kerak. Har qanday xolatda ham jamoani o'yinlarga munosib tayyorlashga harakat qilishimiz kerak.

Baxtiyor Ashurmatov: "Bugun g'alabaga osonlikcha erishganimiz yo'q"