"Gapni ochig'i o'yin asabiy ruhda o'tdi. Yigitlar oxirgi daqiqaga qadar murabbiylar shtabini tahlikada ushlab turdi. Uchrashuvlar markazlashgan holatda o'tmoqda, shunday bo'lsada biz mehmonda to'p tepdik. Mehmonda qo'lga kiritilgan birinchi g'alabamiz bilan jamoamiz rahbarlarini, futbolchilarni tabriklayman. G'alabadan xursandman. Golga qadar omadimiz kelmadi, penaltidan unumli foydalana olmadik. Sen urmasang senga urishadi deganlaridek Temurxo'ja Abduholiqov yuqori saviyadagi hujumchi ekanligini isbotladi va gol urdi. Yigitlarga rahmat aytishni istardim, gol o'tkazib yuborganimizdan keyin ham to'xtab qolishmadi. "Lokomotiv"da ham murabbiy almashgan, futbolchilar yangi murabbiyga o'zlarini ko'rsatishni istashadi. Marat Bikmaevning maydonga tushirilishi raqib o'yinini kuchaytirdi deya olaman. Biz ham so'ngi daqiqalarda vaziyatdan foydalanib gol urib ketdik. Muxlislarimiz oldida yuzimiz yorug' bo'ldi, juda ham muhim bo'lgan ochkoni qo'lga kiritdik. Olti ochkolik o'yin bo'ldi desam yanglishmayman. "Lokomotiv" turnir jadvalidagi asosiy raqobatchimiz edi.

Ettinchi o'rinni olish OCHLda o'ynash sport principlariga to'g'ri kelmaydi. Biz ham ettinchi o'rinni olib OCHLga chiqishni istamaymiz. O'zimizni mehnatimiz bilan bosqichma-bosqich, halol mehnat bilan OCHLga chiqmoqchimiz. Bu yil ham tarkibimiz yomon emas, ayrim masalalarda selekciya ishlarini ko'ngildagidek olib bora olmadik.

O'ng qanot himoyamizni kuchaytirishni istagan edik. Biroq, o'zimiz istagan futbolchilarni ololmadik. Asadbek Sobirjonov va Javohir Sidiqovni "Paxtakor" oldinda OCHL bahslari borligi sabab olib qolishni istadi. Ularning qarorini hurmat qilamiz. Biz olishni istayotgan futbolchilarni ayrimlarini o'z jamoalari bilan shartnomalari bor yoki katta malag' evaziga olib kelish mumkin. Tarkibimizdagi bor futbolchilarga ishonch bildirishga harakat qildik.

Murod Holmuhammedovni qaydnomaga kiritdik. Agarda 11 metrlik penalti ishlaydigan bo'lsak Murod Holmuhammedovni tushirib penaltidan keyin yana zaxiraga olishni reja qilgandik. Uning hozirgi holati ikki taym o'ynashga imkon bermaydi. Bizga futbolchilarimizni sog'lig'i muhim. Penalti tepilayotgan vaziyatda ko'zlarimni ham yumib oldim, biroq gol bo'lmadi. Holmuhammedovni jismoniy holati yaxshi bo'lsa keyingi uchrashuvlarda tushurishga harakat qilamiz",- deydi Ashurmatov.

Baxtiyor Ashurmatov: "Ettinchi o'rinni olib OCHLga chiqishni istamaymiz"